Nova web galega sobre innovación arredor do vidro
martes, 18 de xaneiro do 2011
De entre o
panorama de páxinas web corporativas postas en marcha estes días dende a nosa
terra, cómpre salientar a nova feitura en liña de Cristal Pontevedresa por dous
motivos fundamentais: pola súa aposta polo deseño dixital de vangarda e porque
se trata dunha firma con máis de 50 anos de experiencia, feito que debera
servir de modelo para outras moitas compañías alleas -sobre o papel- aos
servizos informáticos e que non semellan darlle á Rede á importancia que merece
para o seu futuro. A nova páxina de Cristal Pontevedresa, que ten como materia
pendente a inclusión do galego (agardamos que se amañe este punto en breve),
basea unha boa parte do seu potencial nun catálogo online de
aplicacións e de proxectos feitos en vidro laminado e en vidro templado, amais
da colección de mamparas de baño.
“Coa
nosa web”, informan os responsables da firma, “pódense coñecer de primeira man as posibilidades que ofrece a compañía
no desenvolvemento de aplicacións en vidro para a arquitectura, interiorismo,
decoración ou mobiliario urbano”. Co fin de ceibar á mensaxe de todo o que
pode significarlle un atranco, a nova páxina aposta por un estilo visual e directo.
Ao mesmo tempo, pon en xogo unha navegación doada e intituita, o que permite
que “calquera cliente particular poida
atopar rapidamente as aplicacións en vidro que está a procurar, e abraiarse
coas posibilidades de deseño e personalización que ofrece a empresa”,
comenta Francisco Barbeito, director xeral de Cristal Pontevedresa. Amais de
todo isto, a web basea unha boa parte da súa actividade nas seccións Produtos e no
apartado Contract,
unha das canles empregadas pola firma para apostar con meirande forza por incorporar
o vidro a todo tipo de proxectos arquitectónicos.