Nova edición dos premios do COETG para as mellores empresas do eido dixital
martes, 1 de setembro do 2009
Poñer a primeira pedra dunha empresa do sector das novas tecnoloxías non é só pór en marcha unha iniciativa privada TIC. Tamén é, sexa consciente diso ou non a persoa responsable, buscarlle á crise produtiva o seu punto feble. Este compoñente de reactivación económica e de procura de novos eidos de competitividade para a nosa terra non pode, a xuízo do Colexio Oficial de Enxeñeiros de Telecomunicación de Galicia (COETG), ficar sen recoñecementos, polo que o dito órgano vén de convocar a oitava edición do Premio Gerardo García Campos 2009 á mellor iniciativa empresarial TIC. Segundo informa o COETG, trátase de salientar o esforzo das nosas compañías a prol de usar o coñecemento como ferramenta de riqueza e, a maiores, implicar a todos os sectores neste estado de cousas.
O galardón, que se entregará no marco da 14ª Noite Galega das Telecomunicacións e da Sociedade da Información (xuntanza dos profesionais do eido a celebrar o vindeiro 6 de novembro no Gran Hotel da Toxa), conta co patrocinio da Fundación Enxeñeiro Gerardo García Campos e está dotado con 6.000 euros.
A esta contía poderán acceder todas as pequenas e medianas empresas galegas e españolas (pero con actividade ligada á nosa xeografía) relacionadas co sector dixital que leven constituídas menos de cinco anos na data de convocatoria.
Estas son as áreas de actividade que cubrirá o certame como elementos a valorar: introdución das novas tecnoloxías en sectores nos que acheguen valor en procesos tradicionais; desenvolvemento de produtos aplicables en mercados amplos; orientación á exportación; creación de emprego tecnolóxico; actividade en Investigación e Desenvolvemento (I+D); medre do espectro de valor no sector das TIC e deseño de produtos de interese social.
Aquelas firmas que desexen optar ao premio deberán subministrar a seguinte documentación:
- Un cadro explicativo da empresa no que se indique o ano de creación, número de traballadores, facturación e unha breve descrición da súa actividade.
- Memoria explicativa do proxecto ou proxectos que se consideren de mérito para o premio (mínimo 5 folios).
Ámbolos dous documentos deberanse enviar por correo electrónico aos seguintes enderezos: administracion@coetg.es e aetg@aetg.org indicando no asunto: “Premio Gerardo García Campos 2009”. O prazo de recepción das memorias rematará o vindeiro 3 de outubro.