Nokia premia este 29 de xuño en Madrid os proxectos de aplicacións máis innovadores e brillantes
venres, 15 de xuño do 2012
Aviso
a estudantes universitarias/os que estean a piques de dar forma a
ideas innovadoras ligadas á mobilidade: o vindeiro 29 de xuño, a
multinacional Nokia celebra en Madrid, na Universidade Rei Juan
Carlos, o evento coñecido como Hackathon, que non é outra cousa que
unha xornada-certame de presentacións e intercambio de experiencias
arredor das “ideas
máis brillantes”
que están a abrollar arestora dos campus españois. O encontro
insírese en Gamelopers (competición para estudantes desenvolvedores
que busca as aplicacións que meirandes diferenzas marquen) e para
participar nel deberemos realizar xa a inscrición a través da
web da dita competición, e enviar logo un correo de confirmación
cos nomes dos asistentes (só hai 80 prazas dispoñíbeis).
Segundo
informa Nokia, tódolos concursantes do Hackathon poderán competir
individualmente ou por equipos con outros desenvolvedores, “nunha
proba que consistirá en idear o concepto dunha aplicación que logo
terán que defender perante un xurado composto por profesionais da
casa fabricante de aparellos móbiles”.
A competición dará comezo ás 10 horas nunha clase práctica que
xirará arredor do uso da tecnoloxía Java para a creación de
programas nos dispositivos da marca. Logo da adquisición de
coñecemento, os concursantes terán a xornada enteira para pensar un
concepto innovador de aplicación, para ser presentado ante o xurado.
A clausura da xornada realizarase ás 20 horas co anuncio dos
gañadores, que levarán como premio un Nokia
Lumia 710.