Nokia convoca un concurso para dar coa aplicación móbil máis orixinal

A firma de produtos de comunicación móbil, Nokia, en colaboración coa Universidade de Zaragoza, ven de presentar a edición 3.0 do seu desafío Brains Laboratory, un concurso que lle outorgará un premio de 9.000 euros en metálico á aplicación móbil máis orixinal do ano.
O evento xa se celebrou o ano pasado, e visto o gran éxito que obtivo, Nokia e a Universidade de Zaragoza repiten convocatoria para mellorar a que chaman, “maior concentración de cerebros de España”, na que un elevado número de estudantes poñen a proba a súa creatividade para obter a aplicación móbil máis orixinal e creativa.
Ademais dos 9.000 euros de premio, que non é pouco, a persoa gañadora ten a posibilidade real de realizar a aplicación e publicala na tenda Nokia, algo que pode motivar aínda máis, se cabe, aos participantes.
A cita é o vindeiro día 11 de novembro, e na web oficial, Brainslaboratory.com, recóllese toda a información en relación ao evento.