Noia e Tui inauguran cadansúas aulas da rede CeMIT
mércores, 23 de marzo do 2011
O secretario xeral
de Medios, Alfonso Cabaleiro, desprazouse hoxe de maneira virtual ata os
concellos de Noia e Tui, para participar nos actos de inauguración de cadansúas
aulas da rede CeMIT.
Esta rede, que xa
conta agora con 94 aulas presentes en 88 concellos galegos, tense convertido,
en palabras de Cabaleiro “nun referente
tecnolóxico na nosa Comunidade”, e é mostra de que no noso país “se está a superar a fenda dixital”.
Cabaleiro conectouse
coas aulas destas vilas a través de videoconferencia, e mantivo unha conversación
cos alcaldes de ámbalas dúas localidades, Rafael García e Antonio Feliciano,
ediles de Noia e Tui respectivamente, os que valoraron positivamente esta
iniciativa.
O secretario
destacou que “a Xunta está a cumprir o
compromiso de que cada cidadán poida contar cunha aula CeMIT a menos de trinta
minutos do seu lugar de residencia”,
e garantiu o apoio da Xunta aos concellos no mantemento
tecnolóxico destas aulas, para o que se destinan anualmente 560.000 euros,
segundo indicou, “para o servizo de
centro de atención a usuarios e de soporte técnico”.
Na súa intervención, Cabaleiro destacou que as 94 aulas que
compoñen a Rede de Centros de Modernización e Inclusión Tecnolóxica abrangue xa
todas as comarcas de Galicia “onde funcionan
como lugares de encontro, de formación e promoción multimedia”. Aludiu,
así, á campaña Comunícate, posta en
marcha pola Secretaría Xeral de Medios, que conseguiu integrar asociacións,
centros educativos e outras entidades no uso destes espazos.
Salientou, ademais, que “poñen a tecnoloxía ao servizo de
todos os galegos”, incluso na emigración grazas ao uso da vodeoconferencia, e
que no pasado mes de febreiro albergaron 200 eventos cun uso horario diario
nalgunhas aulas de ata 8 horas.