Naturgy pechou 2018 con máis de 1,5 millóns de contadores domésticos smart na nosa terra
venres, 4 de xaneiro do 2019
UFD,
filial de distribución eléctrica de Naturgy, vén de facer balance
do acadado en 2018 en materia de tecnoloxías de rexistro
enerxético-doméstico avanzado. Segundo
detalla, o ano rematou coa cifra de 1.509.529 contadores
intelixentes instalados nos fogares, é dicir, o 98,3% do parque
de equipos da compañía en Galicia, con potencia contratada inferior
a 15 kW.
No
balance tamén se fai saber que o 97,4% destes contadores está
“plenamente integrado no sistema de telexestión”, o seguimento a
distancia, “cumprindo o plan de substitución de contadores segundo
se determina na lexislación vixente”, explican dende Naturgy,
engadindo que estes equipos de control recollen diariamente 215,3
millóns de rexistros horarios na nosa Comunidade.
Por
provincias, UFD instalou xa preto de 692.000 contadores na Coruña (o
99% do seu parque de contadores); máis de 487.500 en Pontevedra (o
97% do parque da compañía nesta provincia), preto de 245.000 en
Ourense (o 99,4% do parque) e máis de 85.000 en Lugo (o 99,9% do
parque de contadores de UFD lucense).
En
España, UFD pechou o ano 2018 coa cifra de 3.610.346 contadores
intelixentes domésticos instalados, o que supón o 99% do parque de
equipos da compañía no país, con potencia contratada inferior a 15
kW.
Detalles
sobre os contadores
Segundo
explica Naturgy, os novos contadores dixitais son no ámbito
doméstico “o elemento sobre o que pivota o desenvolvemento das
redes intelixentes”, fornecendo aos usuarios de máis datos sobre a
enerxía consumida e favorecendo “o aforro e a eficiencia”, unha
lectura da enerxía “con discriminación horaria” que facilite a
adaptación ás tarifas máis vantaxosas para os diferentes hábitos
de consumo, e “un mellor servizo e redución de molestias grazas á
realización remota das operacións (lectura do consumo, altas,
baixas, modificacións ou reconexións) de forma máis áxil”.
As
novas tecnoloxías de rexistro smart, ademais, recollen os
datos de consumo do cliente e transmítenos, a través do propio
cable eléctrico con tecnoloxía PLC, até un concentrador situado no
centro de transformación. Este concentrador, con tecnoloxía sen
fíos, subministra a información aos sistemas da compañía
distribuidora. Logo, as distribuidoras facilitan os detalles
recollidos á comercializadora do cliente para a súa facturación e
pona a disposición do usuario.