Nace GCiencia, o portal galego da ciencia
luns, 25 de novembro do 2013
A
ciencia galega e todos aqueles interesados nela están de
celebración, pois dende culturagalega.org
dáse conta do nacemento dun proxecto
xornalístico na Internet encamiñado a dar a coñecer a
investigación da nosa terra galega en tres idiomas (galego, castelán
e inglés), falamos de GCiencia,
o portal galego da ciencia que xa abriu as súas portas. O eixo desta
páxina serán as reportaxes, informacións e entrevistas, amais da
achega de material audiovisual e tribunas de opinión, blogs
e videoblogs.
Detrás
desta idea atópase unha equipa de xornalistas coordinada por Eduardo
Rolland e Pablo López que afirmaban que “GCiencia
parte da formulación de que o xornalismo debe realizar un esforzo
para axudar a transmitir á sociedade a investigación que se fai en
Galicia, polo xeral dunha alta calidade”.
Cómpre engadir que o desenvolvemento do proxecto editorial levouse a
cabo grazas a seren un dos proxectos premiados no programa de bolsas
iProx do Colexio de Xornalistas de
Galicia e Novacaixagalicia.
E
indo a GCiencia, subliñar que está
estruturada en grandes áreas: ciencia, industria, mar, Universidade;
e a partir de aí unha división por formatos (vídeo, opinión,
etc.) ademais dunha área de Historias GC., que recollen perfís
biográficos de científicos galegos do pasado e unha selección de
artigos en inglés. O obxectivo desta web é analizar proxectos
científicos nos que estean involucradas institucións públicas,
universidades ou empresas privadas, e narrar a actualidade da ciencia
en galego.
En
canto aos responsables de GCiencia, dicir que Pablo López está
estreitamente vinculado dende hai anos ao xornal El
País, comezando a súa andaina
profesional no Faro de Vigo
e colaborando decote en diversos medios. Pola súa banda, Eduardo
Rolland combina os seus artigos para La
Voz de Galicia co seu traballo como
xestor cultural, escritor, director e guionista de televisión e
documentais. A coordinación dixital correrá a cargo do tamén
xornalista Alberto Quian, investigador en medios de comunicación e
autor de El impacto mediático y
político de WikiLeaks.