Nace BEWATS, o novo proxecto da UVigo para loitar contra o lixo mariño
luns, 9 de decembro do 2019
- O investigador Fernando Martín, da Universidade de Vigo
Tirar
proveito dos drons e das tecnoloxías para o manexo da información
xerada por estes para protexer o medio natural mariño do lixo e da
contaminación. Esta foi a gran base do proxecto galego LitterDrone e
este é
tamén o alicerce de BEWATS, iniciativa xurdida ao abeiro do anterior
e que a prolonga e lle dá continuidade. Entre outras cousas,
introducirá máis respostas acerca dos diversos interrogantes que
xorden sobre os refugallos costeiros (de onde provén exactamente?,
de que maneira viaxa nas correntes e en que lugares se deposita?,
etc).
Tras
LitterDrone estiveron investigadores da Universidade de Vigo, da
empresa Grafinta e da Asociación Española de Basuras Marinas. O seu
obxectivo foi desenvolver ferramentas para o control e a xestión
remota de lixo mariño a través de UAV (vehículos aéreos non
tripulados). Esta iniciativa pioneira rematou no pasado mes de
xaneiro, pero terá continuidade a través de BEWATS, que retomará
algúns dos seus desenvolvementos para ir un paso máis aló e facer
seguimento da orixe e o destino dos residuos que acaban nas praias.
Fernando
Martín, investigador do Grupo de Procesado de Imaxe e Realidade
Virtual (GPI-RV) explica que BEWATS (Beach Waste Tracking System)
foi seleccionado na convocatoria Pleamar da Fundación
Biodiversidade cun orzamento total de 131.440 euros para un ano de
duración.
Esta
nova iniciativa consta de tres partes ben diferenciadas. Por unha
banda, tratarase de mellorar algúns aspectos de LitterDrone, como o
software de identificación do lixo ou o programa de integración e
solapamentos das diferentes imaxes tomadas polos vehículos aéreos.
N segunda parte do proxecto os investigadores empregarán os datos
obtidos polas cámaras fotográficas instaladas nos UAV e a
información pública que proporciona o Ministerio de Transición
Ecolóxica sobre o estado das praias.
Unha
terceira etapa do proxecto consistirá en que, unha vez que ese
modelo xerado por ICMAT determine as posíbeis fontes de residuos ou
destinos dos mesmos, intentar comprobalo con imaxes de satélite.
Trátase, apunta Martín, de “ver se eses puntos do mapa xeran
residuos, de que tipo e que hai preto deses lugares que poida estar
xerando o lixo”. Para esta parte do proceso procederase á
contratación dunha empresa de imaxe por satélite, GMV, en
Barcelona.
Para
desenvolver o proxecto, o equipo da UVigo empregará cámaras
instaladas en drons, que permitirán facer un mapeado dos areais.
Será, engade Martín, “unha especie de Google Maps dun momento
concreto coa maior resolución e detalle para identificar os restos
que hai na praia”. Para seguir o fluxo dos refugallos polas
correntes usaranse imaxes de satélite públicas, sobre todo do
Sentinel 2, do proxecto Copernicus da ESA.
O
proxecto abranguerá toda a costa española grazas aos datos
proporcionados polos informes do Ministerio, pero arrancará na ría
de Vigo.