Muxía Turismo Rural premiará os mellores selfies desta primavera en Touriñán
mércores, 9 de marzo do 2016
Muxía quere estar no mundo e nada mellor que botar
man das ferramentas que levan a información dun recanto a outro.
Nesta liña móvese a
asociación Muxía Turismo Rural, que vén de activar un concurso
de selfies baixo o epígrafe
#MiSelfieenelMejorBancodelMundodeTouriñan, unha iniciativa que, como
o seu propio nome indica diríxese a convidar a visitantes e
residentes a que empreguen os móbiles e as redes sociais para
inmortalizárense nun emprazamento especialmente significativo do
concello: o cabo Touriñán e a súa contorna (ese banco de vistas
privilexiadas).
Segundo informa a asociación, o certame
xurdiu para amosar un fenómeno natural que se produce en Touriñán
durante o solsticio de primavera: un fenómeno que se desenvolve a
cabalo entre marzo e abril e que se traduce na última raiola de sol
de Europa. Ou sexa, que quen queira despedirse do astro rei un
día calquera do devandito período (do 20 de marzo até o 25 de
abril) até o abrente do día despois terá o privilexio de ser quen
diga en Europa o último “até mañá”. O premio será para quen
mellor tira partido do lugar privilexiado e das posibilidades dos
móbiles e os diferentes aparellos en materia de autorretrato. Os
participantes, por certo, deben publicar a imaxe
na páxina de Facebook de Muxía Turismo Rural ademais de enviala
ao enderezo electrónico muxiaturismorural2015@gmail.com indicando o
nome do participante, teléfono móbil e cubrindo o formulario. O
concurso comeza o 20
de marzo e remata o 25 de abril.