Movistar migra á fibra aos clientes de ADSL
venres, 25 de abril do 2014
Telefónica quere
revolucionar o mercado das tarifas converxentes polo
que vén de lanzar unha serie de novidades para acadalo no seu
catálogo Movistar Fusión, oferta integrada que arestora conta
con máis de 3 millóns de usuarios e suma máis de 11 millóns de
accesos. Entre os cambios aplicados máis salientábeis cómpre
destacar a migración dos clientes con modalidades de Fusión con
ADSL até 10 Mpbs á nova rede de fibra, unha rede que segundo
informa Telefónica está “presente cada vez en máis fogares e
empresas” e que “será quen de rematar o ano con 10 millóns de
unidades inmobiliarias (UU.II.) en cobertura, ao redor da metade do
total da poboación”.
Esta novidade, que é de
balde, posibilitará un acceso de 10 Mbps reais sobre a rede fixa
“máis rápida e potente no mercado”, engade a operadora, “amais
de optar a máis e mellores produtos converxentes, sempre con
televisión e 4G, polo mesmo prezo e mesmo menos do que viñan
pagando con anterioridade”. Telefónica anuncia tamén o lanzamento
de novos paquetes de servizos integrados e converxentes -fixo, móbil,
fibra e Televisión- que substitúen aos que existían con
anterioridade. Isto implica que a partir de agora e desde 42 euros ao
mes, IVE incluído, os clientes poderán gozar de Movistar Fusión
TV. Segundo explica a operadora, os paquetes que integran tódolos
servizos de Movistar con 10 Mbps serán a partir de xa Movistar
Fusión TV Contigo, a un prezo de 42 euros (incluído IVE);
Para Todos, a 60 euros; Enerxía, cun prezo de 68
euros; Fútbol, a un custo de 75 euros; e Total a 95
euros.
Pola contra, se o cliente
selecciona a opción de fibra de 100 Mbps, os prezos serán de 54
euros, incluído IVE, para Movistar Fusión TV Contigo; 72
euros na opción Para Todos; 80 euros se leva o paquete
Enerxía; 87 euros se leva todo o Futbol; e 107 euros
se o cliente quere Total ou o tres paquetes anteriores.