Movistar levará fibra óptica a 3.500 fogares e empresas das Pontes
venres, 24 de marzo do 2023
Ao
redor de 3.500 fogares e empresas das Pontes poderán gozar nos
próximos meses da fibra óptica ata o fogar (FTTH) de Movistar, en
palabras da operadora “a tecnoloxía de datos máis avanzada do
mercado”. Así llo trasladaron este xoves 23 de marzo a
directora de Telefónica España en Galicia, Paula Beirán, e a
coordinadora de despregamento de FTTH de Galicia, Patricia Rodiño,
ao alcalde do municipio, Valentín González Formoso, durante
unha reunión mantida no concello na que lle explicaron polo miúdo o
estado actual e os plans de despregadura para este ano e o vindeiro.
O
subministro de fibra avanzada de Telefónica España previsto no
municipio dotará de cobertura de FTTH (fibra até o fogar) ao 100%
do núcleo urbano das Pontes, así como ao Polígono Industrial Os
Airios. Suporá, segundo fixo saber Movistar, “un importante avance
en canto a conectividade e acceso a novos servizos de comunicacións,
xa que desta forma o 50% da poboación das Pontes poderá gozar en
2024 da fibra óptica da compañía, á que actualmente teñen acceso
552 unidades inmobiliarias, entre fogares e empresas, un 7,6% da
poboación. Ademais, na zona das Veigas, Telefónica substituirá a
rede de cobre pola de fibra óptica, renovando así toda a
infraestrutura e adecuándose desta maneira ao plan de reurbanización
que se está levando a cabo na zona.
A
directora de Telefónica España en Galicia presentou ao alcalde das
Pontes os estudos técnicos do despregadura e explicou en detalle os
pasos para seguir nos próximos meses. Desde a análise sobre o
terreo das canalizacións, á solicitude de permisos ou o deseño do
trazado polo que se despregará a fibra óptica de Movistar.
Os
traballos están a levarse a cabo en colaboración co Ministerio de
Asuntos Económicos e Transformación Dixital, dentro de Programa de
Universalización de Infraestruturas Dixitais para a Cohesión-banda
larga (ÚNICO).
Telefónica
pechou o ano pasado con cerca do 70% da poboación galega con acceso
a fibra óptica, superando o millón e medio de fogares e negocios
con acceso ás súas redes ultrarrápidas e, no caso da provincia da
Coruña, co 68,3% da poboación cuberta.
“O
FTTH de Movistar”, explica a operadora, “permite aos clientes
dispoñer de velocidades simétricas (de suba e de baixada) da
Internet a 1 Gbps ou de televisión en alta definición, ademais de
opcións de teletraballo, gaming, educación ou trámites
administrativos”. A compañía destaca tamén que ao devandito
súmase “a excelente cobertura móbil de Movistar en Galicia, que
no caso do 4G alcanza ao 98% da poboación, mentres segue despregando
5G”.