Movistar e NEC lanzan un servizo para facilitarnos a actividade empresarial sen necesidade de estarmos na empresa
venres, 15 de febreiro do 2013
Movistar e NEC
presentaron este venres un servizo conxunto para facilitar a vida
móbil dos traballadores: o
servizo PC Virtual. Trátase, como se pode supor a raíz do seu
nome, dunha proposta inserida no que se coñece como computación na
nube, metodoloxía-tecnoloxía de traballo que, entre outras cousas,
consiste en pór en liña todo o que nos atinxe no noso día a día
profesional, incluído o escritorio e a información empresarial
propia que nos sexa preciso manexar. En palabras de Movistar e NEC,
PC Virtual axúdanos “a desenvolver a nosa actividade desde
calquera lugar coma se estivésemos a
utilizar o noso PC corporativo”.
Esta solución, engaden,
proporciona escritorios Windows aloxados na nube de Telefónica. Os
escritorios virtuais en cuestión, ao estar hospedados na Rede,
permiten ao usuario acceder ao seu PC corporativo desde calquera
dispositivo e lugar, informa Movistar. Ao mesmo, engade, “facilita
ao responsábel da área de novas
tecnoloxías da información da compañía un acceso web para
xestionar desde calquera localización, de forma rápida e flexible,
a provisión, actualización e mantemento do parque de escritorios
corporativo”. A
operadora tamén fai fincapé nas vantaxes de seguridade que se
ofrecen: “Ao ofrecer o servizo dende a nube Telefónica
garántase a integridade da información, xa que está protexida
e illada de calquera exposición a elementos externos; a
maiores trátase dun servizo extremo a extremo que non precisa
investimento por parte das empresas nin un mínimo de permanencia”.
Segundo apunta, a dispoñibilidade dos escritorios é inmediata.