Motorola Mobility pechará as súas oficinas en España este ano
venres, 14 de setembro do 2012
- Instalacións de Motorola Mobility en Libertyville (Illinois)
Hai un mes demos conta de que tras a adquisición de Motorola
Mobility por parte de Google a compañía móbil ía
realizar unha importante reestruturación, reducindo o seu cadro de persoal,
pechando oficinas por todo o mundo e limitando o seu catálogo de teléfonos
móbiles a uns poucos terminais, e agora confírmase que esta decisión vai tocar
de preto a España, pois a compañía vai
manter só 3 das súas sedes na rexión que comprende Europa, Oriente Próximo e
África (concretamente en Reino Unido, Francia e Alemaña) o que suporá o
peche de Motorola Mobility España o vindeiro 31 de decembro.
Este peche resulta un tanto rechamante se temos en conta que España está a ser
o país no que Motorola ten mellores vendas en toda Europa, superando aos países
nos que van manter sedes, rexistrando un importante incremento en vendas,
grazas en boa medida pola boa acollida que está a ter o Motorola RAZR MAXX (que
converteu a súa elevada autonomía e grande tamaño de pantalla en elementos chave
para atraer aos usuarios).
Ao parecer, dende Google non están interesados nos negocio de telefonía móbil
que comprende aos terminais de gama media e baixa, senón que buscan
directamente competir co iPhone de Apple, o que será visible o ano que vén,
cando agárdase que Motorola lance só 2 terminais de gama alta.
O peche de Motorola Mobility en España sorprendeu e incluso molestou aos
operadores de telefonía móbil, que en moitos casos pechan acordos de
comercialización de terminais a nivel europeo, polo que perder as filiais
locais da compañía suporía un grande atranco, que podería levar á súa negativa
de comercializar entre os seus clientes os móbiles de Motorola no futuro.
No tocante aos clientes actuais da compañía, en cumprimento coa lexislación
vixente, agárdase que a partir do mes de xaneiro conten cunha segunda compañía
para atender a garantía dos produtos de Motorola adquiridos con anterioridade.