Miñones avoga pola loita policial especializada e a prevención individual para combater a vaga de cibercriminalidade
xoves, 2 de xuño do 2022
- José Miñones nunha imaxe da axencia EFE
O
delegado do Goberno en Galicia, José Miñones, informou este xoves 2
de xuño das medidas que se están a tomar para combater o aumento
das estafas informáticas, un tipo de criminalidade que vai máis na
nosa terra e tamén no resto do ámbito estatal. Segundo apuntou, a
fórmula do éxito para erradicalas baséase na loita policial
especializada e na prevención individual. Fixo estas
declaracións na presentación do Balance
de Criminalidade feito público polo Ministerio do Interior,
e que detalla os datos relativos ao primeiro trimestre deste ano
2022.
José
Miñones advertiu que entre xaneiro e marzo deste ano coñecéronse
en Galicia 6.345 estafas cometidas a través de medios telémáticos.
Tamén engadiu que os delitos cometidos por esta vía, entre xaneiro
e marzo, medraron un 50% respecto dos rexistrados entre xaneiro e
marzo do pasado ano.
Miñones
lembrou a maiores que as Forzas de Seguridade do Estado traballan
nunha dobre vía contra esta delincuencia, con grupos de
investigación especializados en cibercriminalidade, e con accións
de sensibilización e formación dirixidas á cidadanía máis
vulnerábel: a xente maior e a poboación escolar. Asemade, lanzou
unha proclama a prol “da autoprotección e a conciencia individual”
fronte a estes ataques informáticos “que buscan esencialmente un
obxectivo económico”.
En
relación aos efectivos dispoñíbeis, o delegado do Goberno
confirmou un novo crecemento nos efectivos de Policía Nacional e
Garda Civil, que suman entre ambas as 8.654 persoas. Amais, lembrou
que en case 4 anos, o Goberno convocou máis de 18.800 prazas de
acceso aos corpos de seguridade “superando o 100% da taxa de
reposición e esgotando a capacidade máxima dos centros de formación
policiais”. Este incremento de efectivos traduciuse tamén nos
delitos esclarecidos, que subiron un 21% respecto ao primeiro
trimestre de 2021 e no 20% de aumento do número de persoas detidas
ou investigadas neste período.
Segundo
os datos do Ministerio do Interior, a taxa de criminalidade alcanzada
na Comunidade galega en marzo foi de 35 delitos por cada mil
habitantes. Canto ás provincias, A Coruña rexistrou 38,6
infraccións penais por cada mil habitantes; Pontevedra rexistrou
35,4; Lugo, 25,6 e Ourense sumou 30 delitos por cada 1.000
habitantes.
Respecto
da totalidade de infraccións penais rexistradas, a estatística do
Ministerio do Interior contabilizou entre xaneiro e marzo en Galicia
24.475 delitos, 5.997 máis que o mesmo trimestre do ano anterior.