Microsoft e a ONCE unen forzas para facilitarlle o uso das TIC ás persoas con discapacidade
mércores, 4 de marzo do 2009
Tal e como anunciamos
en Código Cero o pasado
luns 2 de marzo, Microsoft Ibérica
e a Fundación ONCE veñen de dar un paso adiante
na estreita cooperación que manteñen dende hai anos, asinando un convenio marco
que inclúe un amplo abano de liñas de colaboración encamiñadas, todas elas, a
promover o acceso ás Tecnoloxías da Información das persoas con discapacidade.
Ambas entidades
comparten o obxectivo de garantir a plena incorporación deste colectivo á
Sociedade do Coñecemento, polo que poñen “especial
énfase” na concienciación sobre a “gran
importancia da accesibilidade universal das tecnoloxías”.
O proxecto que van
levar a cabo conxuntamente ten como finalidade tratar de crear unha meirande “cultura da accesibilidade”, xa que,
segundo afirman, “as tecnoloxías e webs
inaccesibles dificultan o acceso a contidos e servizos dixitais para as persoas
con discapacidade”, o 9 por cento da poboación española e o 15 por cento da
europea.
O acordo foi asinado
por Miguel Carballeda, presidente da ONCE e a súa Fundación, e María Garaña,
presidenta de Microsoft Ibérica, nun acto no que tamén estiveron presentes o
director xeral da ONCE, Ángel Ricardo Sánchez e Alberto Durán, vicepresidente
primeiro ejecutivo da Fundación ONCE.
Carballeda destacou
que este convenio vai axudar a “romper as
barreiras que, en ocasións, supoñen as tecnoloxías para as persoas con
discapacidade”. Asemade, apuntou, “trata
de evitar a fenda dixital que se pode producir co resto da poboación, xa que
sería moi negativo para a integración e normalización das persoas con
discapacidade, e perxudicaría seriamente as súas opcións de acceso ao emprego,
ao ocio ou á comunicación”.
Pola súa parte, María
Garaña, presidenta de Microsoft Ibérica, destacou que este convenio “é un chanzo no apoio continuo de Microsoft á
ONCE e á súa Fundación” e asegurou
ter a “firme crenza común de que a
igualdade de oportunidades pasa por facilitar o emprego das TIC”.
Liñas de cooperación
As novas liñas de
cooperación que veñen de establecer a ONCE con Microsoft, van dirixidas á
necesidade de incrementar a concienciación sobra a importancia de que existan
cada vez máis aplicacións de software accesibles para persoas con
discapacidade, e fomentar o seu desenvolvemento e emprego a nivel global.
Unha das áreas de
colaboración desenvolverase no contexto do portal Discapnet, unha iniciativa da
Fundación ONCE, que consiste nunha web de referencia para o sector da
discapacidade de España e dos castelán parlantes.
Sobre a base desta
experiencia, as entidades van crear un portal europeo de discapacidade
especializado en distintas temáticas, de alcance internacional e multilíngüe. Para
este proxecto, a Fundación ONCE contará coa colaboración de Microsoft, que
aportará unha dotación de software para a súa creación e mantemento valorado en
270.000 dólares, ademais de patrocinar o portal, aportar contido web e as
ferramentas precisas para garantir a súa completa accesibilidade.
Outro dos ámbitos de
actuación conxunta en prol da accesiblidade enmárcarase dentro do proxecto
INREDIS (Interfaces for Relations between Environment and People with
Disabilities). Trátase dun programa financiado polo Goberno español que
desenvolve investigación sobre tecnoloxías que permitan crear canles de
comunicación e interacción entre as persoas con algún tipo de necesidade
especial e o seu entorno.
Microsoft ofrecerá
toda a información e recursos necesarios para que a tecnoloxía que xorda deste
programa poida ser empregada por calquera persoa con discapacidade, con
independencia da plataforma que empregue.
Outras accións que
ambas entidades levarán a cabo conxuntamente son a concienciación pública, a
procura de sinerxías cos Centros de Innovación de Microsoft, a adhesión da ONCE
ao consorcio AIA (Accesibility Interoperability Alliance) e o pulo de DONO, a
iniciativa que as une dende hai dous anos e que está a levar a tecnoloxía a un
custe mínimo a ONGs de toda España.