MeteoSIX, a disposición de grupos de investigación e desenvolvedores
martes, 25 de setembro do 2012
A aplicación MeteoSIX, posta en marcha a comezos de ano
co fin de facilitar a achega da información meteorolóxica en tempo real en
diferentes plataformas, foi desenvolvida por algúns dos equipos de investigación
máis salientábeis da nosa terra. Así nolo
conta a Universidade de Santiago, facendo un reconto das súas funcións, das
experiencias e coñecementos postos en xogo para convertela en realidade usábel
e palpábel, e das vantaxes de aproveitamento para quen queira deseñar
ferramentas semellantes. MeteoSIX, “un
instrumento útil para poder consultar a predición do tempo en calquera lugar e
intre”, foi obra do Laboratorio de Sistemas da Universidade de Santiago
(USC), o Grupo de Arquitectura de Computadores da Universidade da Coruña (UDC) e
máis o Centro de Supercomputación de Galicia (CESGA), contándose con Meteogalicia
en tarefas de coordinación.
Segundo informan, o recurso está a plena
disposición de usuarios avanzados (grupos de investigación universitarios ou
desenvolvedores) para a creación de novas aplicacións para móbiles ou páxinas
web a partir dos datos que está a publicar MeteoGalicia. E todo a través dun
servizo web de balde.
Isto é posíbel grazas en boa medida á propia
natureza do proxecto, aberto, e a elementos concretos como o servidor THREDDS (Thematic Realtime Environmental Distributed
Data Service), unha ferramenta de conectividade entre provedores de datos
científicos e usuarios finais. Baséase, sinala a USC, na xeración dinámica de
catálogos en formato xml a través dos cales se achegan ligazóns de acceso
mediante diferentes protocolos ás diferentes escolmas e conxuntos de datos. A
través dela facilítase acceso público a datos dos modelos operacionais de
MeteoGalicia, datos arquivados e datos externos doutros sistemas.
Sinalar que ao abeiro do proxecto
desenvolveuse de xeito paralelo a aplicación MeteoSIX
Mobile, coa que é posible obter no móbil a predición meteorolóxica para calquera
punto de Galicia ou da súa costa. Está dispoñible para os teléfonos
intelixentes e tablets que contan cos
sistemas Android e iOS (iPhone e iPad). A aplicación xa foi descargada arredor
de 15.000 veces, e permite buscar entre máis de 29.500 localidades e 800 praias
ou seleccionar calquera lugar no mapa, en terra ou no mar, e obter a predición
para ese punto. Por certo que este ano está programado ampliar a cobertura da
aplicación a todo o litoral atlántico e o resto da Península, con novos
servizos como un recurso para coñecer información relativa ás mareas ou ás
horas de saída e posta do sol nun punto determinado.