Meis aposta pola accesibilidade coa súa nova web
venres, 4 de agosto do 2017
Os días pasados o
Concello de Meis estreou a súa nova web, accesíbel baixo o dominio
galego .gal (meis.gal) e co
obxectivo de avanzar en accesibilidade e de artellar unha xanela
única e directa a todos os recursos do municipio, entre os que se
contan os servizos de contratación, de transparencia e de turismo, a
sede electrónica, o portal do cidadán, o bando de avisos, a oficina
tributaria e, por suposto, a actualidade sobre a vida pública do
concello (novas, eventos, axenda).
O obxecto da nova andaina
web era poñer ao alcance de cidadáns e visitantes unha ferramenta
“áxil, dinámica e intuitiva”, segundo
sinalou o alcalde José Luis Pérez o día da súa presentación.
No que se refire á feitura da páxina, fíxose un especial esforzo
por fornecer unha web accesíbel que puidese ser empregada pola
totalidade das veciñas e veciños.
O día da presentación o
rexedor engadiu que o novo sitio en liña “fomenta a participación
dos cidadáns grazas á súa interactividade” e ao feito concreto
de dispoñer de varias caixas de correos de suxestións e
reclamacións. O novo portal está dispoñíbel ao cen por cen para a
inclusión de máis servizos e funcionalidades atendendo aos
requirimentos que vaian xurdindo ao longo do tempo.