MeigaLabs apadriña a presentación da sexta convocatoria dos premios INCUVI-Emprende
xoves, 26 de xaneiro do 2017
Onte
o Edificio Politécnico do Campus de Ourense servía de marco de
presentación da sexta edición do programa
INCUVIG-Emprende,
unha convocatoria
encamiñada ao alumnado e aos egresados recentes
da Universidade de Vigo na que terán a oportunidade de presentar
(até o 2 de
febreiro) as súas ideas de negocio e atopar o apoio preciso para
levalas adiante. Ao
acto de presentación asistían
representantes das entidades implicadas na convocatoria:
a Área de Emprego e Emprendemento da
Universidade de Vigo e da Vicerreitoría do Campus, a Tecnópole,
a Cámara de Comercio de Ourense, a Confederación de Empresarios de
Ourense, Expourense e a Asociación de Empresarios Novos
de Ourense. No acto tamén participou José Antonio Tesouro, de
MeigaLabs Software
Development, beneficiaria dos Premios INCUVI-Emprende
en 2015 e da súa continuidade, os Premios INCUVI-Avanza,
en 2016. MeigaLabs, como lembraremos, é unha firma centrada no desenvolvemento de servizos de gamificación, aplicacións e videoxogos para plataformas móbiles. Ten acadado un grande éxito coa aventura gráfica Corrupt Mayor Clicker.
“O
obxectivo de INCUVI-Emprende
é inculcar o espírito emprendedor”, recalcou Alejandro Martínez,
director da Área de Emprego e Emprendemento da Universidade de Vigo.
Para acadalo ofrécese
aos emprendedores un espazo físico onde establecerse nos seus
inicios, amais de formación,
asesoramento e
outros servizos.
En
canto ao certame, a data límite para presentar as propostas
empresariais é o 2 de febreiro, estas propostas deberán estar
relacionadas con calquera das ramas de coñecemento contidas nos
plans de estudo da Universidade de Vigo. Poderán participar: o
alumnado dos tres campus que estea matriculado en estudos de
primeiro, segundo ou terceiro ciclo, grao ou mestrado así como
titulados e tituladas pola Universidade de Vigo no curso 2013/2014 ou
posteriores.
Os
proxectos poderán ser elaborados de xeito individual ou en grupos
dun máximo de catro persoas.
As
propostas deberán ser orixinais e a súa autoría corresponderá á
persoa ou persoas que os presentan. Entre todos os proxectos
presentados seleccionaranse os 12 mellores, que terán como premio un
espazo nas pre-incubadoras dos campus de: Vigo (seis oficinas),
Ourense (catro) e Pontevedra (dous). Asemade, durante un ano
participarán nun programa no que se desenvolverán actividades
formativas, de asesoramento e titorización dos proxectos, así como
a subvención, durante o mesmo período, dos custos de estadía no
espazo de traballo na preincubadora.
Engadir
que no mes de xaneiro publicarase a segunda convocatoria de
Incuvi-Avanza, un programa que trata de consolidar como empresas dúas
das iniciativas seleccionadas no Incuvi-Emprende da edición
anterior.