Medra o número de internautas en España e redúcese a fenda de xénero
martes, 18 de maio do 2021
Coincidindo
con este 17 de maio, xornada que ademais de ser o Día das Letras
Galegas tamén é o Día da Internet, o observatorio estatal ONTSI
(dependente da entidade Red.es) enumerou os detalles máis relevantes
do
seu informe Perfil sociodemográfico dos internautas,
no que se constata o alto nivel
de coñecemento tecnolóxico que existe entre a mocidade (os
estudantes son a poboación máis formada, os que máis protexen a
súa privacidade e datos persoais en Internet), a importante cidra de
persoas usuarias da Rede que existen xa en España (a cifra de
persoas que accederon a Internet nalgunha ocasión alcanzou os 37,3
millóns, aumentando nun millón e medio de persoas en 2020) e os
salientábeis avances dados para reducir a fenda dixital de xénero.
Estudantes
Como
dixemos, na investigación faise saber que as persoas estudantes e as
que teñen maior nivel educativo son os segmentos poboacionais que
máis utilizan as opcións dispoñíbeis en canto a privacidade e
protección de datos persoais. Hai 25 puntos porcentuais de diferenza
entre a poboación con nivel educativo alto e nivel educativo baixo,
á hora de realizar accións como restrinxir o acceso á localización
xeográfica, limitar accesos ao utilizar redes sociais, ou denegar
permisos de información persoal con fins publicitarios.
Máis
internautas
Segundo
recolle o documento, cada vez é maior o número de españois que
acceden a Internet. En concreto, durante 2020 a cifra de persoas de
10 e máis anos que accederon a Internet nalgunha ocasión situouse
en 37,3 millóns, o que supón preto dun millón e medio máis de
persoas que no ano anterior. Ademais, a gran maioría deles (o 91,3%)
accederon nos últimos 3 meses. Destaca que, durante o último ano, a
porcentaxe de internautas que se conectaron semanalmente a Internet
alcanzou o 94% (3,6 puntos porcentuais máis que en 2019), mentres
que o 83,1% da poboación fixérono a diario (5,5 puntos porcentuais
máis que o ano anterior).
O
informe tamén indica que case oito de cada dez internautas dispoñen
dalgún dispositivo conectado a Internet. A dispoñibilidade de
dispositivos conectados é menor entre mulleres (77,2%) do mesmo
xeito que entre a poboación de menor nivel educativo e maior idade.
Pola contra, entre os homes estes dispositivos mostran maior
penetración (81,9%), do mesmo xeito que entre as persoas máis novas
e de maior nivel educativo.
Menos
fenda
A
brecha de xénero no uso de Internet redúcese. O 94,2% de homes
conectouse nalgunha ocasión mentres que esta porcentaxe sitúase no
93,8% no caso das mulleres.
O
informe constata, porén, que seguen a existir diferenzas no uso de
Internet ao segmentar pola variábel “idade”, xa que a poboación
internauta ten un perfil lixeiramente máis novo que a poboación
total. En concreto, o 26,2% dos internautas que se conectan cunha
frecuencia semanal ten 55 anos ou máis fronte ao 31,2% da poboación
total.