Medra o número de adolescentes galegos que acceden a contidos sexuais na Rede
venres, 1 de abril do 2011
Proseguen os estudos e as advertencias sobre
os riscos que achega o feito de ter liberdade absoluta para empregar Internet
dende idades temperás. Unha vez máis, os apuntamentos chegan dende a plataforma
Adicións Dixitais,
especializada en promover un uso san, racional e controlado destas redes entre
a cativada e os adolescentes. Para esta entidade, o problema, lonxe de
esmorecer con tempo, vaia a máis, tanto a nivel español como a nivel galego. A
razón principal radica en algo que sobre o papel é unha boa nova: o
espallamento das redes. De feito, calcúlase que no país galego arredor do 52,1%
dos fogares teñen xa banda larga, e o 91,6 teléfono móbil. Segundo engade a
plataforma, as cifras absolutas indican que hai entre doce e trece mil nenos
galegos de idades entre os once e os dezaseis anos “vendo sexo en Internet co total descoñecemento dos seus pais”.
O problema, ao noso xuízo, non radica no feito
querer ver sexo, algo que vén de antigo como proceso natural de desenvolvemento
e que por moito que se advirta dende certos colectivos, nunca prexudicou a
ninguén. O problema é a visión que se ofrece do sexo dende unha parte
importante dos servizos de Internet (machista, violenta, frívola), cen por cen
accesibles para quen queira velo, e a libre disposición para permitir que entre
calquera, sexan cales sexas as súas intencións, no diálogo en liña que manteñen
decote os adolescentes.
A isto hai que engadir o moi prexudiciais que
poden ser as propias actividades dos rapaces en Internet, enviando imaxes a
quen non deben ou achegando os seus datos sen ter coñecemento claro de cales
poden ser as consecuencias. A xuízo de Adiccións Dixitais, un dos grandes
riscos de todo isto é sen lugar a dúbidas o ciberacoso,
unha práctica que pode ter as máis graves consecuencias e que segundo explica a
plataforma ten dúas vertentes principais: cando se acosa a un adolescente por
parte dun grupo dunha mesma idade ou cando se fai por cuestións sexuais.
Neste segundo caso, engaden, o acosador adoita
“ser unha persoa maior, ás máis das veces
moi intelixente e paciente que agarda o intre oportuno para dar caza á súa
presa”. O problema, índice, é que esa presa pode ser o noso fillo.
Adicións dá máis datos sobre o estado das
redes na nosa terra en relación á adolescencia e a nenez:
· O 61,6 por cento das vivendas teñen
computador.
· O 48,9% ten banda larga.
· O 78,5% ten teléfono fixo e o 91,6% teléfono
móbil
A situación, malia deixarnos un pouco por debaixo da medio estatal, abonda como para pór en marcha determinadas medidas que contribúan ao control parental no que a uso das novas tecnoloxías se refire. “Con esta tecnoloxía ao seu alcance, os adolescentes téñeno moi doado para facer o que queren e para conseguir que aos pais lles sexa moi difícil evitalo.