Medio cento de directivos do noso tecido produtivo avaliaron na USC diferentes xeitos de innovar

A Facultade de Ciencias Económicas de Santiago acolleu este martes un encontro sobre metodoloxías para impulsar unhas cantas cousas a nivel empresarial: máis competitividade, máis rendibilidade, máis presenza na Rede e máis concorrencia en en mercados internacionais. A xornada Innovación e marca: Pancas para a internacionalización das empresas veu da man do Foro de Marcas Renomeadas Españolas e contou coa colaboración do Máster en Dirección e Xestión de Comercio Exterior da USC. Participaron nela, entre outros, Sara Cantorna (vicerreitora de Economía), Francisco Conde, conselleiro de Economía, e Antonio Abril, vicepresidente do Foro de Marcas e secretario xeral do Consello de Inditex. Asemade, a xornada contou coa presenza de medio centenar de altos directivos de empresas galegas, algunhas delas moi relacionadas co eido TIC, como por exemplo Televés.
A vicerreitora salientou na xornada “os notábeis resultados que a USC está a recoller en materia de innovación e desenvolvemento tecnolóxico, non só polo elevado número de proxectos que se levaron a cabo no último ano, e que representa un volume de financiamento superior aos 200 millóns de euros, senón sobre todo polo recoñecemento e a notoriedade que estes tiveron”. Cantorna avaliou de maneira moi positiva o labor da USC como axente de transferencia do coñecemento, xerador de innovación e de emprendemento, “nun contexto onde os recursos que recibe tanto dos distintos ámbitos da administración como das empresas e doutros axentes sociais reducíronse de xeito significativo como consecuencia da crise económica”. Pola súa parte, o conselleiro destacou a importancia de vincular os esforzos das empresas, as universidades, centros tecnolóxicos e as propias administracións estatal e autonómica para mellorar a competitividade, apostando pola innovación.
A secretaria xeral de Ciencia, Tecnoloxía e Innovación do Ministerio de Economía e Competitividade, Dª María Luisa Poncela García, impartiu na xornada a conferencia A estratexia española de ciencia, tecnoloxía e innovación: O recoñecemento de España como país innovador. A ela seguíronlle dúas mesas redondas sobre os factores claves para a competitividade empresarial e as sinerxías entre innovación, internacionalización e marca nas que interviñeron o director xeral de Estratexia de Televés, José Luís Rodríguez Carneiro; o director de I+D+i de Conservas Calvo, Antonio Cuevas; o director de Mercadotecnia de Urovesa, Xusto Sierra; a subdirectora xeral de Applus+, María José Louzao; o director de Novos Negocios de Gaes, Joan Gassó; o conselleiro delegado de Elzaburo, Antonio Tavira; o director de Mercadotecnia e Vendas de Finsa, Virgilio Romeu; xunto a destacados investigadores e académicos como o director do Centro de Supercomputación de Galicia, Javier García; o director da Cátedra UNESCO de Emprendemento, Carlos Hernández; ou o director do Master en Dirección e Xestión de Comercio Exterior, Miguel Anxo Otero.