Más de cen expertos en tecnoloxías de datos participan estes días na décima conferencia IberGRID
luns, 23 de setembro do 2019
O
Centro de Supercomputación de
Galicia (CESGA) organiza esta semana (dende hoxe até o 26) a
décima conferencia hispano-lusa de IberGRID sobre cooperación
científica e tecnolóxica. A edición 2019 desta xuntanza, na que
participan o CSIC e diversas entidades de España e Portugal, estase
a celebrar no Campus Sur de Santiago (na Facultade de Químicas, nas
dependencias do CSIC e máis no CESGA) co obxectivo de fomentar “a
interpretación e a adopción de servizos para apoiar proxectos de
investigación de vangarda”. Na conferencia intercambian
coñecemento avanzado máis de cen expertos en cómputo e
almacenamento de datos científicos de ambos países.
As
xornadas foron inauguradas pola responsábel da European Sciencie
Open Cloud do Ministerio de Ciencia, Innovación e Universidades,
María Cuesta, o vicepresidente de Investigación Científica do
CSIC, Jesús Marco de Lucas e o director-xerente do CESGA, Mauro
Fernández Dabouza.
A
décima conferencia hispano-lusa contará con diversos relatorios,
nos que se abordarán temas como a cooperación entre comunidades
ibéricas de investigación, o fomento da adopción da Open
Science, o desenvolvemento de servizos de software innovadores e
o I+D para redes, servizos informáticos e ciencia baseados en datos.
Asemade,
o encontro acubillará dous importantes acontecementos: o lanzamento
do proxecto EOSC-Synergy (European Open Science Cloud) e a reunión
anual da Research Data Alliance.
Rede
IberGRID
A
rede IBERGRID créase en 2003 en virtude dun acordo de cooperación
científica e tecnolóxica asinado entre España e Portugal e os
pactos de colaboración rubricados en 2005 en termos de tecnoloxías
e redes de comunicación. O chamado Plan Ibérico Común aborda a
implementación dun proxecto para a conexión das redes de
investigación e de coordinación das aplicacións científicas,
infraestruturas de computación distribuída, infraestruturas de
supercomputación e acubillos de datos. Esta colaboración inclúe,
ademais das infraestruturas, unha serie de reunións e conferencias,
que se celebran de forma alternativa en ambos os países.