María Jesús Lorenzana e Patricia Argerey entregan os Premios Galicia de Innovación e Deseño 2023
xoves, 21 de decembro do 2023
A
conselleira de Economía, Industria e Innovación, María
Jesús Lorenzana, e a directora da Axencia Galega de Innovación
(GAIN), Patricia Argerey, entregaron este xoves 21 de decembro os
Premios Galicia de Innovación e Deseño. No ámbito do deseño,
resultaron premiados Uqui Permui pola súa traxectoria e Ismael Velo
como talento emerxente, así como a empresa Costa Comunicación
Visual; mentres que no tocante á innovación os galardoados son
Centum Research & Tecnhology, Pasek Minerales e Carme Pampín.
No
transcurso da gala, a conselleira sinalou que estes galardóns
impulsados por GAIN (Consellería de Economía) serven para poñer de
relevo “como a innovación e o deseño cumpren un papel esencial
para mellorar a competitividade das empresas e a calidade de vida das
persoas”, servindo tamén para reivindicar a marca Galicia, á que
contribúen finalistas e gañadores co seu traballo e creatividade.
Na
súa intervención, a conselleira lembrou que “nos seis últimos
anos, as axudas da Xunta para impulsar a I+D+i de xeito específico
nas pequenas e medianas empresas beneficiaron a case medio milleiro
de pemes, mobilizando proxectos por valor de 47 millóns de euros”.
Tamén recordou que a Administración autonómica ten en marcha o
programa de deseño para a innovación e a sustentabilidade. “Esta
folla de ruta recolle a aposta da Xunta de Galicia polo deseño como
ferramenta de transformación económica e social”, dixo.
Como
dixemos, na categoría de profesionais do deseño resultou gañadora
Uqui Permui, responsable do estudio Uqui Cebra, en Santiago de
Compostela, mentres que Ismael Velo (Ourense) foi o galardoado no
apartado de talento emerxente no deseño. A empresa premiada como
caso de éxito de incorporación do deseño á súa estratexia
empresarial foi Costa Comunicación Visual (A Coruña).
As
outras tres categorías dos galardóns entregados hoxe buscan
recoñecer a profesionais e empresas de Galicia que contemplan a
innovación como un elemento clave para o desenvolvemento da súa
estratexia profesional e o seu crecemento empresarial. A peme
gañadora foi Centum Research & Technology (Vigo), mentres na
categoría de grande empresa, cunha actividade innovadora ao longo
de, como mínimo, dez anos, distínguese a Pasek Minerales (Cariño).
No tocante á categoría para empresarios e profesionais cunha
traxectoria na que a innovación fose unha das súas características
relevantes, nesta edición distínguese a Carme Pampín.