Máis de trinta profesionais afondarán nos desafíos da eAdministración en Santiago
xoves, 16 de marzo do 2017
O goberno dixital
avanza e con el, cousas como transparencia, participación cidadá,
tramitación electrónica ou eficiencia administrativa. Porén, é
preciso avaliar os desafíos que implica esta transformación, tanto
de cara ás propias institucións públicas e os seus traballadores,
como no que atinxe á sociedade. Esta análise de retos e
repercusións é un dos grandes obxectivos da
segunda edición do Encontro de Cooperación para o Desenvolvemento
da Administración Electrónica. O evento, que se desenvolve
baixo o epígrafe Un compromiso conxunto cara aos cidadáns,
vén da man da Axencia para a Modernización Tecnolóxica de Galicia
(AMTEGA) en colaboración coa Federación Galega de Municipios e
Provincias (FEGAMP) e co Consello Superior de Letrados e Avogados de
Comunidades Autónomas. Celébrase os días 23 e 24 de marzo o
Edifico CINC da Cidade da Cultura.
En palabras das ditas
entidades, “este foro busca analizar o impacto e os retos do novo
marco normativo en materia de Administración Electrónica (leis
39/2015 e 40/2015) no funcionamento das Administracións Públicas”.
Co devandito obxectivo,
está previsto convocar máis de 30 profesionais do ámbito
tecnolóxico, xurídico e de distintos departamentos das
administracións autonómica, estatal e local, afondando en temas tan
salientábeis como as novidades normativas no eido da
eAdministración, a cooperación administrativa para avanzar no
proceso dixitalizador, as notificacións electrónicas, o arquivo
electrónico ou a transparencia pública. Serán en total sete mesas
de debate en dúas xornadas nas que tamén se analizarán as liñas
de colaboración entre as distintas entidades para xuntar esforzos no
pulo da Administración Electrónica.
Amais das mesas de
debate, haberá un espazo de exposición para mostrar en detalle os
servizos dixitais que teñen ao seu dispor os cidadáns (con stands
de AMTEGA e das nosas deputacións onde os asistentes poderán
inscribirse en diferentes servizos). Quen desexe participar neste
encontro, que é de balde, deberá darse de alta nos portais da
AMTEGA e de
Eido
Local, onde tamén está publicado o programa
das xornadas. Estas están dirixidas a profesionais do
sector público.
O Encontro enmárcase
dentro das actuacións do Plan de Goberno Dixital 2020 que vén
desenvolvendo a Xunta para consolidar a Administración Dixital.