Máis de cen profesionais galegos participaron no foro vigués sobre intelixencia competitiva
venres, 15 de febreiro do 2013
Finalmente, a
participación no Foro sobre Intelixencia Competitiva organizado no
Centro
de Excelencia de Vigo superou as expectativas da organización:
foron máis de cen os representantes das PEME galegas os que acudiron
a este encontro para obter recursos e metodoloxías de análise de
mercado previo lanzamento dun produto ou dun servizo. Máis polo
miúdo, tiveron a oportunidade de ver, in situ, as vantaxes
que achega a fórmula da intelixencia competitiva nos negocios e ao
servizo da innovación, entendéndose por aquela un xeito de
desenvolver e tirar o máximo partido, rendíbel e único, das
capacidades propias dos profesionais dunha empresa. Entre os
relatores do foro atopábanse representantes das empresas galegas
Marine Instruments, Vasco Galega e Galopín Parques, que compartiron
cos asistentes os éxitos derivados da implantación de sistemas de
vixilancia competitiva nos seus sectores.
A xornada, como dixemos,
veu da man do Centro de Excelencia de Vigo, promovido pola Escola de
Organización Industrial (EOI), o Consorcio da Zona Franca de Vigo
(CZFV) e a Universidade de Vigo; e co-financiado polo Fondo Europeo
de Desenvolvemento Rexional e o Ministerio de Industria. O foro, nun
plano máis concreto, contou coa presenza activa de Sergio Larreina,
director de Intelixencia Competitiva de Pons Patentes e Marcas; Paula
Igrexas, coordinadora da Unidade de Vixilancia Tecnolóxica do Centro
Tecnolóxico AIMEN; e Pablo López, membro da Xunta Directiva da
Asociación para a Promoción da Intelixencia Competitiva de Galicia.
O seu cometido foi amosar, ante as máis de cen persoas reunidas, as
vantaxes que ofrece a aplicación destes innovadores procesos á hora
de tomar decisións empresariais, xa que permiten analizar e
interpretar a información da que se dispón para convertela en
coñecemento. O tres relatores coincidiron en salientar “que a
presión competitiva global, o peso da innovación e a tecnoloxía, e
os continuos cambios que se producen nos mercados provocan que o
éxito ou o fracaso dun proxecto ou produto poida depender, en gran
medida, do coñecemento previo que se dispoña da oferta do sector,
dos clientes e da competencia; e salientaron na importancia de
realizar un seguimento continuo destes factores, para actualizar esta
información permanentemente”.
Como dixemos, ademais de
avaliar e expor o significado da intelixencia competitiva, os
asistentes puideron coñecer diferentes exemplos concretos de
compañías galegas que aplican con éxito sistemas de vixilancia
competitiva. Neste senso, Carlos Groba, responsable TIC de Marine
Instruments, explicou como a integración no seo da firma deste
sistema permitiulle coñecer as necesidades dos seus clientes e
desenvolver produtos que respondesen ás mesmas; e insistiu en que a
análise en profundidade dos factores que determinan o triunfo dun
produto antes de sacalo ao mercado “pode minimizar os riscos e
garantir a viabilidade dun proxecto”. Nicolás Troncoso, R&D
manager de Vasco Galega, compartiu o sistema desenvolvido pola
consignataria para coñecer o que están a facer as empresas máis
competitivas dentro do seu sector. Apuntou que a vixilancia
competitiva facilita a Vasco Galega coñecer os puntos fortes dos
seus principais competidores e desenvolver proxectos que lles fagan
competir, de igual a igual, nun mercado global.
Por último, Pablo Buyo,
responsable de produción de Galopín Parques, relatou como o sistema
de vixilancia competitiva fíxolles diferenciarse da competencia
chegando a deseñar produtos máis atractivos empregando materiais e
sistemas que se utilizan con éxito noutros sectores industriais.