Máis de 90 empresas participarán na edición máis internacional da feira Pont-Up Store
mércores, 20 de setembro do 2023
Este
20 de setembro presentouse o programa da
décima edición do Pont-Up Store,
que concentrará a maior parte da súa actividade nas rúas e espazos
de Pontevedra os días 29 e 30 de setembro. Haberá
máis de 30 actividades concentradas en dous días. Porase o foco na
internacionalización, na mercadotecnia sensorial e no emprendemento
musical.
Na
cita participaron a responsábel de Promoción Económica do Concello
de Pontevedra, Anabel Gulías; a vicerreitora do Campus de Pontevedra
da UVigo, Eva Lantarón; o deputado de Economía da Deputación de
Pontevedra; Rafael Domínguez; e o director do Pont-Up Store, Pedro
Figueroa, que destacou “a traxectoria destes dez anos de apoio ao
emprendemento grazas á iniciativa da Universidade, ao apoio de
moitas entidades públicas e privadas que se foron sumando ao
encontro, e ao voluntariado que fai posíbel boa parte da loxística
do evento”.
En
total, a carpa situada na praza de España vai acoller a 32 startups
galegas, das que un 75% están lideradas por mulleres. En canto a
distribución xeográfica, un 60% proceden da provincia de Pontevedra
e o resto repártense entre as provincias de Lugo e A Coruña. Sobre
os ámbitos das propostas, o compromiso ambiental está presente en
case todas as iniciativas, e mesmo hai varias propostas nas que o
“corazón do negocio susténtase na responsabilidade social e
ambiental”, segundo explicaron os participantes na presentación,
salientando tamén a presenza nesta edición de consultorías,
enxeñarías, iniciativas de coidado persoal, propostas educativas,
de téxtil, de complementos, de decoración, de turismo e do sector
da alimentación. Nesta edición a organización da feira Pont-Up
recibiu un total de 127 candidaturas, o que significa 4 solicitudes
por cada praza dispoñible. O encontro aínda dará cabida a outras
20 iniciativas empresariais que se presentarán dentro dos stands
institucionais que tamén teñen o seu espazo na carpa.
Pont-Up
Exprés
A
iniciativa Pont-Up Exprés facilitará novamente o achegamento e o
diálogo entre persoas emprendedoras e o tecido empresarial galego
cun formato dinámico e áxil, a través de pitchs ou
presentacións de cinco minutos de duración. Ao final da exposición
de cada proxecto, as persoas ouvintes darán un feedback e
farán unha valoración a partir dos criterios relacionados coa súa
experiencia e sector de actividade. Como cada ano, o talent show
permitirá a 8 iniciativas empresariais presentar os seus proxectos a
un xurado integrado que nesta edición estará integrado por Luis
Lopez-Boado Prieto, director xeral Pereira Productos del Mar; Xosé
Lois Lamazares Vence, coordinador xeral de Daveiga Producións; Maite
Rodríguez Calabria, responsábel de deseño en FINSA; e Ana Olveira
Blanco, socia de Abeluria S. Coop Galega e presidenta da Unión de
Cooperativas Espazocoop. As empresas seleccionadas nesta edición son
a marca galega de roupa e pezas de vehículos 5special, onde as
viaxes, as motos e o surf son a base da inspiración; o espazo
infantil Donde viven los cuentos, Soc. Coop. Gal. para nenas e nenos
de 0 a 9 anos con actividades para toda a familia; o proxecto
Landratech que pon en valor o aproveitamento das landras ou belotas
para consumo humano a través de produtos como fariñas, café e
té fabricados a partir de landras; a empresa de desenvolvemento de
software Lareira Digital, focalizada no software aberto e libre así
como noutras áreas de desenvolvemento coma hardware, IoT,
videoxogos, etc; a innovadora proposta de Luxsit que crea
espectáculos de luces personalizados con enxames de drons
sustentábeis como alternativa aos fogos de artificio; os produtos de
madeira creados por Néboa na ría para un estilo de vida sinxelo e
pausado; as creacións de Tombo bags, onde deseñan e confeccionan
bolsos e complementos a partir de velas de barco reutilizadas, e a
marca de doces artesáns gourmet elaborados en Galicia,
Perusiñas.
En
anteriores edicións, o Pont-Up Exprés serviu para iniciar
colaboracións empresariais tanto no ámbito público como no privado
e, sobre todo, axudou ás equipas de cada empredemento participante a
pulir e mellorar as súas ideas de negocio e á conversión do seus
produtos e servizos.
As
actividades desta décima edición arrancaron en realidade o pasado
día 15 co evento da Comunidade WordPress de Pontevedra que celebrou
un novo WordPress en Acción, para ensinar a persoas sen
coñecementos a crear páxinas webs con WordPress.
O
mércores inaugurarase a exposición 10 anos apoiando ao
emprendemento que mostrará nas rúas de Pontevedra un resumo das
distintas edicións do Pont-Up Store e das súas achegas ao
ecosistema emprendedor na última década, incluíndo a evolución
tanto da súa imaxe gráfica como as innovacións incorporadas ano
tras ano para atender novos ámbitos do emprendemento. A mostra,
conceptualizada por Galpón Lab e a Asociación para o Emprendemento
e a Innovación Pont-Up Store, estará instalada nas rúas da cidade,
desde a praza de España ata a Casa das Campás pasando polo
lateral do Concello, desde o mércores 27 ao sábado 30.
Dentro
das actividades previas, está previsto tamén o inicio do Hackaton
HEI4FUTURE o mércores 27 pola tarde que estenderá a súa
programación ata o venres. A actividade desenvolverase na aula do
Teatro Principal de Pontevedra e estará centrada no desenvolvemento
de prototipos para desafíos empresariais relacionados con saúde,
deporte, medicina e tecnoloxía, baixo a dirección de Diego Parajó,
da empresa Xeneme, O venres, ao remate da actividade celebrarase unha
mesa redonda para presentar os resultados do proxecto e falar de
historias de emprendemento.
Programa
para venres e sábado
Dentro
do ámbito da internacionalización, o venres de 12:15 a 13:05 a
entidade Ticket2Europe en colaboración co IES Valle Inclán e
Abanca presentarán unha sesión sobre o emprendemento social a
través de métodos de educación non formal. Na sesión, que
estará moderada por Ana del Valle, participará alumnado do IES
Valle Inclán e responsábeis de emprendementos internacionais que
forman parte do proxecto Pont-Up: Social Entrepreneurship,
co-financiado polo programa europeo Erasmus+. E o sábado, entre as
10:45 e as 11:45, na Casa das Campás, Ticket2Europe propón unha
nova sesión na que se presentará o programa europeo Erasmus for
Young Entrepeneurs (Erasmus para emprendedores novos), na que
Belén Mendoza, responsábel deste proxecto europeo na Cámara de
Comercio de Santiago de Compostela, explicará as claves para formar
parte da experiencia.
Nesta
edición a feira Pont-Up volverá dar espazo ás últimas tendencias
da mercadotecnia sensorial, a través dunha colaboración coa empresa
viguesa de marketing olfactivo e
aromatización Alpematic Experiencias Olfativas, que recuperará e
actualizará o odotipo creado en 2019 para o Pont-Up Store. Pola súa
parte, os músicos Suso Vaamonde e Abrahán Sande Couso estiveron
traballando na creación dunha peza musical que a partir de agora
será a banda sonora do Pont-Up Store, e que será interpretada por
Gonzalo Maceira e a equipa de Estudo Bonobo.
Dez
anos apoiando o talento emprendedor
A
feira Pont-Up Store xurdiu no 2014 no marco da Conferencia Ibérica
para o Emprendemento (CIEM) que se celebrou en Pontevedra no mes de
outubro, e que partía dunha iniciativa da Universidade de Vigo
(Vicerreitoría do Campus de Pontevedra) e do Grupo de
investigación G4 PLUS de Desenvolvemento Estratéxico:
organizacións e territorios no marco do Campus CREA da Universidade
de Vigo. Concibiuse xa dende o principio como un evento
multisectorial, aberto a toda a cidadanía cuxo obxectivo é o
apoio ao emprendemento e o incremento da cultura emprendedora na
sociedade.
Ao
longo das 9 edicións celebradas creceu e evolucionou ata
converterse no punto de referencia do novo emprendemento no noso
territorio, grazas á colaboración e o patrocinio de entidades
como a Concellaría de Promoción Económica do Concello de
Pontevedra como patrocinador principal; a Universidade de Vigo como
impulsora do evento coa colaboración do seu Consello Social; e os
apoios da Deputación de Pontevedra, a Xunta de Galicia, Zona Franca
de Vigo, Abanca e R, entre as máis de 50 entidades públicas e
privadas que durante estes anos foron sumándose ata conformar un
ecosistema de apoio ao emprendemento co obxectivo de converter a
Pontevedra na capital galega das mellores iniciativas empresariais.
Como
resultado desa colaboración e das redes tecidas entre a comunidade
emprendedora que foi participando nas distintas edicións, no ano
2022 creouse a Asociación Pont-Up Store, que xa agrupa a máis de
200 empresas e que ten como obxectivo aproveitar a experiencia e os
valores promovidos polo encontro ao longo destas nove edicións,
garantir a continuidade da celebración anual do evento e apoiar
tanto aos novos emprendementos como a toda a comunidade de
participantes, constituída por preto de 300 iniciativas procedentes
de toda Galicia.