Máis de 100 persoas participaron na xornada sobre economía intelixente e sustentable celebrada en Santiago
venres, 27 de xullo do 2012
O pasado 24 de xullo celebrouse en Santiago,
na sede de FEUGA, unha
xornada dirixida a amosar as novas tendencias que a tecnoloxía ten de corrixir
erros pasados, nuns tempos nos que non se cubrían de abondo cuestións como
o respecto ao medio, a eficacia, a rendibilidade ou a optimización de recursos.
A xuntanza, dirixida tamén a fomentar a colaboración galega arredor desta
tecnoloxía máis intelixente, veu da man da Plataforma Tecnolóxica Galega de
Medioambiente (ENVITE), da Plataforma Galega de Loxística (LOXISCA) e da Plataforma
Tecnolóxica das TIC (VINDEIRA), e celebrouse baixo o epígrafe A eco-nomía
intelixente: smart and green economy. En virtude desta tripla participación,
cubríronse tres piares fundamentais para a nosa economía presente e futura: a
loxística, o medio ambiente e as novas tecnoloxías da información.
Durante o transcurso deste encontro de balde, organizado e promovido entre as
tres plataformas devanditas, expuxéronse os diversos programas de financiamento
do CDTI para proxectos de investigación próximos á materialización no mercado,
amais de programas europeos para iniciativas tecnolóxico-dixitais con
aplicacións no medio ambiente, na busca de enerxías limpas, alternativas e
rendíbeis, e máis na mobilidade.
Á xornada acudiron máis de 100 persoas, entre
membros das devanditas plataformas e asistentes procedentes de outros sectores
con interese en afondar na filosofía da Smart
and Green Economy, como son os sectores da construción ou das administracións
públicas, é o caso dos concellos, que tamén tiveron representación na xornada,
amais de membros de diversas entidades locais.
A xornada tamén acolleu a presentación dunha
serie de casos prácticos nesta aposta pola innovación e polas tecnoloxías de
menor consumo. Foi o caso do Proxecto Smartcity (posto en marcha por Endesa en
cidades como Málaga, Barcelona ou Búzios en Brasil co obxectivo de favorecer a
automatización e telexestión das redes, amais de promover a sustentabilidade e
a eliminación de barreiras), o Proxecto SUM no que participa o Concello de Vigo
(para impulsar políticas locais e rexionais en relación á mobilidade urbana
sustentable) ou os servizos urbanos intelixentes de Ferrovial (para favorecer
un equilibrio óptimo entre aforro económico, servizos de calidade e
investimento a longo prazo).
Na xornada tamén deron a coñecer as súas liñas
de traballo os centros CITIC, CITIUS (Centro Singular de Investigación en
Tecnoloxías da Información), ITMATI (Instituto Tecnolóxico de Matemática
Industrial), EnergyLab e Gradiant.
Tamén participaron as empresas galegas Imatia
e Teimas, achegando a súa oferta tecnolóxica no eido da economía intelixente.