Máis da metade dos españois escollen os SMS para felicitar o Nadal
xoves, 18 de decembro do 2008
Segundo un estudo levado a cabo pola
operadora de telefonía móbil Yoigo, os SMS
van acaparar todo o principal papel á hora de felicitar as Festas de Nadal este
ano pois é o medio que prefiren máis da metade dos españois (o 57 por cento)
para facelo. As chamadas telefónicas
son, por outra banda, o método que prefire a cuarta parte da poboación do
estado para felicitar por esta época do ano aos seus seres queridos e só un 7
por cento dos homes e un 13 por cento das mulleres se decantan pola tradicional
postal de Nadal.
É máis que probable que este último método
(tan bonito e persoal como é por outra banda) se vexa totalmente desbancado
este ano polas mensaxes curtas a móbiles que, dende a súa invención, non fan
máis que incrementar as súas cotas de popularidade entre os usuarios de
telefonía móbil. De feito, o 80 por cento dos españois envía máis de 5
felicitacións a través de SMS e o 50 por cento, máis de dez.
Un dos obxectivos do estudo levado a cabo por
Yoigo era “coñecer as peculiaridades das
distintas comunidades autónomas” e no caso de Galicia non se deberon ver
defraudados cos resultados obtidos posto que somos os que máis SMS enviamos
para felicitar o Nadal. Iso si, tamén somos os que menos chamamos pero é que
non se pode ter todo e a retranca sae mellor cando se pensa ben e se redacta
con coidado (aínda que só poidamos empregar un reducido número de caracteres).
Os “menos
faladores” son, de feito, os homes galegos e as mulleres andaluzas (quen o
diría) e os que máis felicitacións de Nadal reciben son as catalás e os
galegos.
O estudo tamén revela que o 44 por cento das
mulleres galegas enviamos (inclúome na grella) máis de 15 SMS de felicitación
por estas datas e que somos as que menos nos acordamos dos compañeiros de
traballo á hora de facelo (na miña defensa direi que iso débese a que podemos
facelo persoalmente que é moito mellor e máis económico).
Tendo en conta os datos do estudo e facendo
un exame de conciencia, aproveito este artigo para felicitarlle o Nadal a
tódolos nosos lectores, aos meus compañeiros de traballo e xefes (nunca está de
máis facer un pouco a pelota) e á miña familia (que seguramente nunca lerán
isto e terei que gastar os 15 céntimos de rigor para felicitalos de novo a
todos). Felices Festas.