MRW permitirá o pagamento de reembolsos a través do móbil

A solución MYMOID amósase estes días no MWC de Barcelona

A empresa de transporte urxente MRW está a amosar no Mobile World Congress de Barcelona un novo servizo que cambiará o envío de mercadorías grazas á solución reembolso móbil de MYMOID, permitindo que as páxinas web de comercio electrónico ofrezan aos seus usuarios todas as vantaxes de combinar o envío con reembolso e o pagamento por móbil ao recibir o produto, o que supón tamén unha mellora considerable para os comercios á hora de xestionar os seus ingresos (evitando a administración e o tráfico de cartos en efectivo).
A mecánica deste servizo é sinxela: o usuario elixe como método de pagamento o reembolso móbil e descarga a aplicación móbil do servizo (dispoñible para iOS e para Android) para confirmar o pedido a través do teléfono; no momento da entrega o repartidor enviará a orde de pagamento ao móbil do usuario e este só terá que confirmalo dende o seu dispositivo.
Este novo servizo de pagamento a través do móbil permite vincular todos os medios de pagamento dun usuario co seu smartphone, contando cunha grande seguridade para que as compañías poidan detectar posibles fraudes precozmente. Os datos que manexa a aplicación están cifrados, precisando dun contrasinal para acceder á mesma e un PIN para autorizar cada un dos pagamentos.