Lousame celebra o 25-N con obradoiros tecnolóxicos para mulleres e para escolares
luns, 14 de novembro do 2022
O
Concello de Lousame, a través da Mesa Local de Coordinación
Interinstitucional fronte á Violencia de Xénero de Lousame,
adiantou algunhas das actividades programadas dende o Consistorio
para as vindeiras semanas co gallo da conmemoración do 25 de
novembro. Amais, debullou algunhas das accións recentes de
igualdade. Por exemplo os Obradoiros 20=22, desenvolvidos os meses de
setembro e outubro para mellorar a empregabilidade das mulleres
locais formándoas na busca de traballo, na capacitación
informática, no comercio electrónico e na mercadotecnia dixital.
“Nestes
tres obradoiros participaron 11 mulleres”, apuntou Silvia Agrafojo,
engadindo que foi un programa levado a cabo coa colaboración da
FEMP, que lle concedeu ao Concello de Lousame unha das 10 axudas que
convoca a nivel nacional.
Así mesmo, o Concello adheriuse a
campaña De Fronte, da
Deputación da Coruña, participando nesta ocasión directamente
tamén o CPI Cernadas de Castro en dúas actividades. A primeira
chámase Ciberacción para público xuvenil: Afrontamento das
violencias na Rede. Trátase
dunha proposta para traballar sobre a violencia dixital a través
dunha ciberquedada con centros de Secundaria dos concellos
cuxa celebración está programada para o mércores 23 de novembro,
explicou a concelleira. A segunda actividade, Ciberacción para
público infantil: Canto sabes sobre as violencias dixitais?
consiste nun xogo interactivo cunha guía didáctica para o alumnado
dos cursos de 4º, 5º e 6º de Primaria, que quedará pendurado na
Rede como recurso pedagóxico.