Lalín aposta de cheo polo visual no seu novo portal turístico

O Concello de Lalín presentou os días pasados a nova páxina web municipal de turismo, turismo.lalin.gal, un sitio en liña creado con recursos propios (o persoal do departamento de Novas Tecnoloxías) e que destaca ante todo polos esforzos postos en xogo para salientar os atractivos do termo municipal a través dunha proposta visual e moi interactiva. A web foi dada a coñecer polo concelleiro de Turismo, Francisco Vilariño, o edil de Novas Tecnoloxías, Tomás Vilariño e o técnico de Turismo, José González Sixto. Na rolda de prensa fixeron fincapé no aforro importante, de 10.000 euros, que se conseguiu grazas ao gran traballo despregado polo departamento de Novas Tecnoloxías.
Tomás Vilariño explicou que “se trata dunha web moi visual e interactiva”, na que existen seccións como “que ver, que facer, como chegar, multimedia, Camiño de Santiago, ou servizos de interese”. Tamén sinalou que se trata “dun proxecto vivo e participativo” que se irá actualizando e dotando de contido case a diario.
Pola súa banda, o concelleiro de Turismo, Francisco Vilariño, comezou agradecendo “o magnífico traballo dos empregados municipais e en especial do concelleiro de Novas Tecnoloxías por desenvolver este portal”. Asemade, fincapé en que se trata “dunha ferramenta moi útil, innovadora, moderna, dinámica, pero ao mesmo tempo sinxela e manexábel, coa que se dá a coñecer e se pon en valor o noso municipio e tamén se convida a visitar Lalín”.
O responsábel de Turismo fixo saber que este proxecto parte do Plan estratéxico de Turismo presentado o ano pasado e que incluía entre as súas estratexias a necesidade de contar cunha web turística propia e específica. Tamén engadiu que “é posíbel que se trate dunha das páxinas de turismo máis destacadas dos concellos da nosa mesma categoría”.