Krokprices, o primeiro comparador de prezos en liña de alimento para mascotas

En tempos de crise o maxín traballa arreo, e máis se falamos de publicidade, mercadotecnia e o conxunto todo de estratexias que rodean ao mercado. Nesta nova damos conta dun novo portal creado para aforrar diñeiro no alimento das mascotas. Trátase de krokprices.com, segundo os seus responsábeis “o primeiro comparador de prezos de comida para cans e gatos creado por profesionais do sector” e que ten por obxectivo achegar aos propietarios destes animais unha comparativa das mellores tendas en liña para que atopen o seu penso habitual ao mellor prezo comparando entre máis de 10.000 importes e obtendo, en moitos casos, máis dun 40% de redución sobre un mesmo produto.
O dito proxecto xurdiu tras analizar o factor máis relevante para un cliente na Rede: o prezo. Segundo os creadores do comparador, o 80% dos navegantes xa saben o que queren mercar e só buscan o mellor prezo. Esta idea fíxose realidade grazas ao investimento de 75.000 euros grazas a catro emprendedores: Óscar González e Antonio Soriano como programadores avanzados e co-founders do portal, David Lara como product manager e co-founder, e Sergio González CEO do proxecto.
A quen vai encamiñada esta páxina web? A dous grandes públicos: o xeral e aos profesionais. A este último, krokprices.com ofrece comparar o catálogo das tendas co da competencia nun só clic, tamén poder dispor de gráficos con todos os datos de produtos e prezos, así como avisos diarios de baixadas de prezos. En canto ao público en xeral, aos propietarios das mascotas, ofréceselle atopar os mellores prezos, beneficiarse de promocións exclusivas e recibir avisos de baixadas de prezos dos seus produtos favoritos.
Asemade, Krokprices ofrece un servizo premium a empresas do sector que desexan e necesitan estar informadas en todo intre de cales son as tendencias de prezos sendo útil tanto para marcas como para webs de vendas de comida para mascotas, ofrecéndolles informes semanais das variacións do mercado en canto a prezos e tendencias.