Komunikando.net abre tenda en liña
mércores, 1 de xuño do 2011
O selo-web galego Komunikando.net, especializado en apoiar
e promover a nosa música nuns tempos, os actuais, en que mesmo semella estar
mal visto promover e apoiar a nosa cultura, segue a teimar en novos xeitos de
acadar os seus obxectivos: recordarlles ás administracións, aos medios de
comunicación e á sociedade por enteiro que temos un rico patrimonio musical que
vén de séculos e que periga por múltiples motivos. Nesta liña, e na de tirar
proveito da Rede para alentar a creatividade e máis a difusión, é onde se
insire a súa nova iniciativa: unha
tenda propia de produtos en liña.
Este establecemento dixital, como era de
agardar, dirixirase a axudar a financiar e máis a espallar a música galega en
galego. Máis en detalle e segundo comentan os responsables do selo, os
beneficios xerados irán destinados en boa medida “para pagar os gastos da elaboraçom dos futuros programas de Non
Saimos Do Lixo”.
CDs e camisolas serán os produtos estrela,
sendo o método de pato elixido o da transferencia bancaria. Polo que atinxe a Non Saímos do Lixo, lembrar que se trata
dun programa de humor para o devandito portal de música en galego, programa que
está dirixido por Denis Mutante, Marcos Paino e Roberto Grandal. Arestora, para
facernos unha idea do interese xerado na nosa comunidade en liña por este
programa, Non Saímos do Lixo conta con máis de 1.500 seareiras/os na rede
social Facebook.
