Kiply, Twibex35 e Xesol amosarán a súa andaina innovadora no CDTIC
xoves, 27 de outubro do 2016
- O Centro de Novas Tecnoloxías de Galicia, sede do Centro Demostrador TIC
O Centro Demostrador
TIC (CDTIC) da Axencia para a Modernización Tecnolóxica de Galicia
vai desenvolver e acoller o día 3 de novembro unha interesante
sesión directamente encamiñada a visualizar a traxectoria de éxito
de tres novas firmas innovadoras da nosa terra. Trátase da Xornada
Coñece as experiencias de Startups tecnolóxicas: de Galicia ao
mercado global, que se levará a cabo nas instalacións do
centro (no Centro de Novas Tecnoloxías de Galicia en Santiago) en
horario de 11.00 a 12.00 horas.
Segundo informa AMTEGA,
de quen depende o CDTIC, a sesión (unha sesión tripla) servirá
para que os asistentes coñezan de primeira man o percorrido de Kiply
(que ofrece un software para medir a produtividade persoal), Twibex35
(coa súa ferramenta para captar o sentimento de mercado de valores e
investimentos) e Xesol
Innovation (con proxectos de eficiencia enerxética, motor e
cidades intelixentes). “Esta xornada”, explica AMTEGA, “está
destinada principalmente a potenciais demandantes das solucións
tecnolóxicas presentadas”. Para asistir cómpre inscribirse na
web do CDTIC. A asistencia é de balde e aínda é posíbel
anotarse, xa que as prazas, polo momento (a día 27 de outubro), non
están cubertas.