José Blanco amosa nunha xuntanza con Ineo as oportunidades europeas para o noso sector TIC
luns, 14 de decembro do 2015
A asociación
Ineo, agrupación referencial galega de empresas TIC, vén de
celebrar unha nova edición do seu ciclo de debates Sobremesa
con..., e fíxoo en compaña do eurodeputado galego José Banco.
Segundo informa Ineo, a presenza de Blanco neste novo encontro para
socios é unha mostra de que se están a reforzar os contactos da
asociación coas institucións europeas, e este fortalecemento dos
contactos achega xa resultados de especial relevancia e visibilidade,
“sendo unha ocasión perfecta para que os membros de Ineo
participen activamente e tiren proveito para as súas empresas destas
iniciativas”. Son palabras de Carlos Conde, presidente de Ineo, que
exerceu de anfitrión no encontro xunto coa directora xeral da
asociación, Lucía Gregorio.
José Blanco, en calidade
de representante da Comisión de Industria, Investigación e Enerxía,
e membro da Asemblea parlamentaria Euro-Latinoamericana, debullou as
oportunidades que se abren para o sector das Tecnoloxías da
Información e Comunicación (TIC) no marco da Comisión Europea
perante os socios de Ineo, que amosaron durante a quenda de preguntas
especial interese nas cuestións relacionadas co papel que Bruxelas
pode exercer como prescriptor de empresas europeas en Latinoamérica
e o financiamento de determinadas actuacións a través dos fondos
que achega a Unión Europea como doadora.
O político lucense,
asemade, referiuse ás últimas intervencións en Bruxelas, en
especial sobre o Mercado Único Dixital, aproveitando para insistir
na necesidade de reducir a fenda dixital, “un aspecto crucial para
evitar os riscos máis evidentes da dixitalización, a exclusión de
colectivos e contornas xeográficas, un asunto de máxima
importancia”, sobre todo en Galicia, indicou, onde temos problemas
evidentes “de envellecemento e despoboamento”.
A maiores do devandito,
Blanco afondou na idea dunha “Europa unida que elimina barreiras de
comunicación entre os cidadáns”. Neste senso, lembrou o que ao
seu xuízo é un dos logros máis recentes no devandito ámbito, que
é o adeus ao roaming en xuño de 2017.
A presenza en Vigo do
eurodeputado José Blanco respondeu ao convite cursado pola
delegación de Ineo no xantar que mantiveron en Bruxelas
durante a recente visita da asociación TIC ás institucións
europeas, na que analizaron conxuntamente o acceso a fondos
comunitarios e os servizos destinados a PEME
Lembrar que as Sobremesas
de Ineo con... son un tipo de encontros aos que están convocados
os seus socios e que teñen como obxectivo, “nun ambiente
distendido”, facer unha reflexión conxunta ao redor da experiencia
ou a área de influencia do convidado, “orientando a charla cara
aos aspectos máis relacionados coa innovación e as novas
tecnoloxías”.