Investigadores galegos amosan o potencial das nosas tecnoloxías perante colegas escandinavos
luns, 12 de xaneiro do 2015
Buscar vieiros e canles
para a promoción e o afianzamento da nosa tecnoloxía nos países do
norte e o centro de Europea foi o gran obxectivo do I Seminario de
Innovación posto en marcha ao abeiro do proxecto
Táctica. No encontro, desenvolvido os días pasados en CITEXVI,
investigadoras/es
da Universidade de Vigo puideron operar en clave de networking con
representantes de todo tipo de centros europeos de innovación.
Durante as xeiras de traballo, amosouse o potencial dun amplo abano
de tecnoloxías: aplicacións móbiles de eSaúde; apps para
persoas con diversidades funcionais que facilitan a comunicación
médico paciente ou interfaces que fan máis doado o manexo de
ordenadores e tabletas mediante o seguimento da retina para pacientes
en UCI ou semellantes.
Estes foron algúns dos
achados expostos a pasada semana I Seminario de Innovación posto en
marcha ao abeiro do proxecto
Táctica. Co obxectivo de determinar os posíbeis modelos de
transferencia mixta que coexisten entre Galicia, Finlandia, Estonia,
Luxemburgo e Portugal, a xuntanza supuxo, en termos da Universidade
de Vigo, “un chanzo máis de cara á montaxe de proxectos de
networking (COST, H2020, etc.) e á dar a coñecer a cada un
dos membros asistentes os equipos da Universidade de Vigo que
traballan en temáticas afíns e que se centran, sobre todo, en
cuestións relativas á administración electrónica nos contextos de
saúde, eficiencia enerxética e medio ambiente”.
O seminario contou coa
participación de numerosos expertos de universidades e empresas
finlandesas , estonianas e luxemburguesas; a adxunta do reitor,
Regina Carreira, así como de numerosos investigadores do centro
AtlantTIC, no que se agrupan boa parte dos investigadores da Escola
de Enxeñaría de Telecomunicación, e do denominado Observatorio
para a Gobernanza, grupo de investigación G3 do campus de
Pontevedra.
O proxecto Táctica,
formulado polo centro de investigación AtlantTIC da Universidade,
está orientado a favorecer e redundar nos beneficios que o
coñecemento xerado nas universidades pode concretar en termos de
negocios empresariais na nosa Comunidade. Os seus responsábeis
prevén destinar en 2015 uns 500.000 euros a impulsar esta canle de
comunicación coas empresas. “Para isto”, sinala a UVigo, “usaranse fórmulas como as UTE, Unións Temporais de Empresas
nas que participen centros tecnolóxicos e empresas galegas con
outras entidades internacionais especializadas no desenvolvemento de
solucións tecnolóxicas de elevado valor engadido e impacto tractor,
o que redundaría nunha maior competitividade do noso territorio”.
Asemade, os días pasados valorouse a posibilidade de adoptar
fórmulas de transferencia innovadoras, como son os contratos de
servizos de I+D, de colaboración pública – privada ou inclusive a
intermediación e a explotación comercial a través de EBT galegas
altamente tecnolóxicas en cotitularidade con multinacionais.