Investigadores da UVigo e a UDC constatan a utilidade de ChatGPT na publicidade
xoves, 11 de xaneiro do 2024
O
42% das e dos profesionais da publicidade e a mercadotecnia de
Galicia consideran que ferramentas de Intelixencia Artificial
xerativa como ChatGPT van cambiar ao cen por cen a súa profesión.
Esta é unha das principais conclusións dun estudo sobre a
implantación deste tipo de tecnoloxías no sector realizado
polos investigadores da Facultade de Comunicación da UVigo Xabier
Martínez Rolán e Juan Manuel Corbacho, xunto coa investigadora da
UDC Teresa Piñeiro.
A
través dunha enquisa realizada a preto dun centenar de profesionais,
os investigadores puideron coñecer tamén que o 28% usa decote
ferramentas como ChatGPT, da que valoran a súa utilidade “nas
primeiras fases dos procesos creativos”, como apunta Martínez
Rolán.
Os
resultados deste estudo recóllense nun capítulo do libro Management
for Digital Transformation, publicado por Springer e editado
polos investigadores Carolina Machado e J. Paulo Davim, das
universidades de Minho e Aveiro, respectivamente. “Quixemos saber
como se está a empregar a IA no sector da comunicación e da
mercadotecnia”, sinala Martínez Rolán dun estudo que presenta os
resultados dunhas enquisas realizadas a través do Clúster da
Comunicación de Galicia e de Creatividade Galega.
“A
principal conclusión deste estudo é que a taxa de adopción é moi
alta”, sinala este investigador, que incide en que este
cuestionario levouse a cabo “catro meses despois de abrirse ao
público” ChatGPT, a ferramenta de xeración de contido sintético
con maior grao de coñecemento e uso entre estes profesionais. Preto
do 50% das e os participantes no estudo afirmaban tela probado ou
empregado cando menos unha vez, mentres que outro 28% sinalaba tela
incorporado “aos seus fluxos de traballo habituais”. Pola contra,
outras ferramentas, como Dall-e ou Notion/Craft presentaban
porcentaxes de coñecemento e uso máis baixos e só foran empregadas
cando menos unha vez por preto do 30% dos participantes.
“Sorprendeunos
moito que o 42% afirmasen con rotundidade que estas ferramentas íano
cambiar todo na profesión”, sinala Martínez Rolán dos resultados
dun estudo que amosa unha “foto fixa” dun momento de “eclosión”
destas tecnoloxías, pero tamén a visión dunha parte destes
profesionais de que se trata de “ferramentas disruptivas, como o
foron no seu día o correo electrónico ou o smartphone”.
Nese senso, esta investigación amosa tamén a existencia de “dúas
posturas” entre os profesionais da comunicación, a publicidade e a
mercadotecnia, a daqueles que avogan “por incorporala” aos seus
procesos de trabalos e a dos que poñen o foco “sobe todo nos
perigos das malas praxes”. Neste punto, o artigo detense tamén nos
“riscos e cuestións que é preciso ter en conta” por parte dun
sector que, como lembra Martínez Rolán, centra o seu labor “na
creación de contidos”.