Investigadores da UPV sinalan a escasa incidencia das TIC na mellora real da educación

Como facer que as novas tecnoloxías da información se integren na aprendizaxe coma un elemento máis, enriquecéndoa e achegando o mellor de si mesmas? Preguntas coma esta coa que encabezamos hai moitas, pero coas respostas é outro conto. A Sociedade da Información ten esta característica: está chegando, pero aínda non chegou de todo. Isto que acontece na nosa vida diaria ocorre tamén no eido educativo, e achegar o meirande número de respostas é o obxectivo do grupo de investigación da Universidade do País Vasco (UPV-EHU) que segundo nos conta a Plataforma SINC está a substituír a actual gramática da escolarización por outra nova que tire proveito de todo o potencial das novas tecnoloxías.
Os seus traballos baséanse na constatación dunha realidade: a soa presenza dos computadores nunha clase non varía en case nada o xeito de recibir e dar as clases. Asemade, sinalan, ao longo dos dous últimos anos non se teñen constatado as melloras na aprendizaxe que se prometían coa entrada en xogo das TIC.
E isto, sinala o grupo, malia o amplo potencial das novas ferramentas á hora de espallar o coñecemento alén das limitacións físicas do tempo, o espazo e a xente á que temos acceso dentro dos muros dunha clase.
A raizame do problema está, como se pode supoñer, en que a novidade inserida é so unha novidade de forma e non de fondo. En certa maneira, é como incluír un novo tipo de material escolar para que todo fique máis ou menos da mesma maneira. A xuízo do equipo de investigador, a escola tradicional ten uns esquemas tan ríxidos que adoptan as TIC no seu contorno como unha parte da “gramática” (entendida como conxunto de normas e métodos) que lles é propia dende hai moitos anos, se cadra de máis. Así, as novas tecnoloxías son empregadas para memorizar e repetir datos, en troques de servir para crear e investigar. Entre os obxectivos do seu estudo cóntase a elaboración dun alicerce teórico que axude a mellorar a ensinanza e promover novas canles de estudo que deixen marxe para seguir comprendendo a relación educación-tecnoloxía.
Para estes investigadores, unha boa parte da solución do problema estaría en sermos máis críticos cos esquemas do sistema educativo: “O primeiro paso cara ao cambio é identificar e combater o modo ordinario de proceder dentro do sistema escolar ou desvelar as regras internalizados para poder levalos ao nivel da conciencia”.