Instagram acolle estes días a terceira edición do ciclo Usa a Lingua
mércores, 2 de decembro do 2020
Estes
días estase a celebrar, co
impulso da axencia júnior de publicidade Freshysweet (integrada por
estudantes da Facultade de Ciencias Sociais e da Comunicación do
Campus de Pontevedra), un ciclo de coloquios e actuacións para
“promover, normalizar, estender e fomentar o uso do galego entre a
mocidade”. Trátase do programa Usa
a Lingua, que se desenvolve a través da rede social
Instagram.
A
situación sanitaria xerada pola COVID-19 obrigou neste 2020 a
trasladar a un formato virtual unha iniciativa que en anteriores
edicións levou a Freshysweet a promover diferentes actividades na
facultade. “Pensamos que Instagram era a rede social perfecta para
levar a cabo o evento nestes tempos”, sinala este grupo de alumnos
e alumnas, que lembran que se trata da plataforma que reúne máis
xente nova, con máis dun 36% de usuarios e usuarias menores de 24
anos.
Un
coloquio co noso cómico e actor David Amor abriu na tarde deste luns
o programa de actividades desta terceira edición de Usa a Lingua,
que abrangue unha serie de coloquios con persoas “de grande
interese nos eidos da comunicación, música e cultura galega”,
xunto coas actuacións musicais de The Rapants e Dakidarría na tarde
do venres. Conducido polo estudante Vinto Tajes, este primeiro
coloquio permitiu afondar na traxectoria do devandito humorista e
deportista galego.
Cinco días de actividades
Para
esta edición virtual, as e os integrantes de Freshysweet
seleccionaron unha serie de convidados que, sinalan, “son
referentes en redes sociais que teñen algo que dicir a prol da
protección da nosa lingua”. Así, tralo coloquio deste luns con
David Amor, a actividade continúa este martes, tamén ás 16.00
horas, cun coloquio, conducido pola alumna Sarai Mariño, con
Patricia Hermida, responsábel de formacións musicais como
Heredeiros da Crus e Agoraphobia, con quen, indican desde
Freshysweet, “falaremos do seu labor como xestora de grupos
galegos”.
Nesa
mesma xornada, ás 19.00 horas, sumarase ao evento Dani Irimia,
protagonista da última campaña publicitaria da cadea Gadis. O
mércores, Tajes conducirá o coloquio cos responsábeis da empresas
de produtos en galego Aí Falaches!, mentres que o xoves ás
16.00 horas, celebrarase un coloquio, moderado por Cristina Martínez,
coas persoas responsables de Orgullo Galego, “a conta de
Instagram e Facebook dedicada á defensa da lingua galega con máis
seareiros, 300.000 entre ambas redes sociais”.
A
terceira edición de Usa a Lingua completarase o venres, coas
actuacións musicais, en directo a través desta rede social, dos
grupos Dakidarría e The Rapants, programados para ás 19.30 e 20.30
horas, respectivamente.