Innovación destina cinco millóns de euros para a creación da Cidade Tecnolóxica de Vigo

A Consellaría de Innovación e Industria vén de asinar un convenio de colaboración coa entidade Cidade Tecnolóxica de Vigo (CITEXVI) para o desenvolvemento de actuacións que leven á creación e posta en operatividade da Cidade Tecnolóxica no Campus Universitario de Vigo.
A través do devandito convenio, Innovación destinará preto de cinco millóns de euros (4.989.356 euros) para a posta en funcionamento da construcción como espazo físico de pulo a iniciativas de fomento da I+D+i. Preto do 77 por cento desta subvención (3,8 millóns de euros) estarán destinado ao contrato para a execución da obra.
O obxectivo deste proxecto é o habilitamento, posta en operatividade e explotación de edificios dedicados a actividades de investigación e desenvolvemento, que satisfagan as necesidades físicas e de carácter tecnolóxico dos diversos equipos de investigación tanto de eido público como privado.
O CITEXVI creará, entre outros servizos, unha infraestrutura de altas prestacións orientada a facilitar e apoiar a posta en marcha de novas iniciativas empresariais de base tecnolóxica, o desenvolvemento de empresas con actividades básicas ligadas ás novas tecnoloxías (nas áreas do proceso, produto ou servizos) ou proxectos innovadores no seu sentido máis amplo no Campus da Universidade de Vigo.
Este convenio enmárcase dentro do Plan Galego de Investigación, Desenvolvemento e Innovación Tecnolóxica 2006-2010 (INCITE), que recolle entre os seus obxectivos a necesidade de acometer a articulación do Sistema Galego de Innovación e o impulso da transferencia de coñecemento e tecnoloxía.
Na imaxe, maqueta da Cidade Tecnolóxica de Vigo realizada polo arquitecto brasileiro Paulo Mendes da Rocha, gañador do Pritzker 2006.