Inés Rey loa o espírito transformador da Coruña na inauguración de Ecosystems2030
venres, 3 de xuño do 2022
Este
xoves 2 de xuño o recinto PALEXCO (A Coruña) acolleu a inauguración
dun evento tecnolóxico de gran relevancia: a segunda edición de
Ecosystems2030, que está a xuntar
até hoxe venres, no dito pazo de congresos, a medio centenar de
expertos de empresas tecnolóxicas de primeira liña, co reto común
de avaliar as posibilidades que abren tecnoloxías disruptivas, ou
sexa, a robótica, a Intelixencia Artificial, a cadea de bloques, as
tecnoloxías inmersivas, o ámbito fintech ou os vehículos
intelixentes e autónomos. A
inauguración veu da man da alcaldesa Inés Rey, quen salientou o
potencial da cidade “como polo de atracción de proxectos dixitais
e sustentábeis”.
A
rexedora estivo acompañada durante o acto de apertura por Omar
Hatamleh, presidente executivo de Ecosystems2030 e ex-directivo da
NASA, e Nikki Eberhardt, presentadora do evento.
Inés
Rey incidiu “na importancia de sentar as bases da transformación
da cidade nun gran polo de atracción de proxectos dixitais e
sustentábeis, creando un ecosistema de investimentos acorde coas
grandes empresas do sector”. E engadiu, facendo alusión á axenda
A Coruña 2030 destinada a impulsar o novo paso evolutivo da cidade: “Quero
presentarvos e invitarvos á próxima gran transformación da Coruña.
Un espazo de innovación e investigación ante os novos retos
sociais, medioambientais e dixitais. Un ecosistema empresarial que
entende as propostas de innovación e o necesarias que son para
atraer novos investimentos. Un ecosistema urbano aberto para integrar
as novas tecnoloxías para axudar a resolver os retos de cidade nun
mundo global”.
Segundo
comentou Inés Rey, o obxectivo do Concello é converter A Coruña
“nun espazo de innovación capaz de facer fronte aos novos retos
dixitais e ás novas posibilidades de negocio”. Para iso, estúdanse
as novas tecnoloxías, como o metaverso, e invístese en proxectos de
gran relevancia como a Cidade das TIC, que aspira “a ser a
referencia da Intelixencia Artificial a nivel nacional e un gran polo
de xeración de empregos”, explicou, engadindo que “somos
conscientes de que non podemos levar a cabo esta transformación nós
sós, que temos que ser parte dun grande ecosistema de
transformación”.
Pola
súa banda, Omar Hatamleh quixo agradecer o compromiso do Concello
con este congreso. "Trouxemos un evento transformador para a
cidade cun enfoque tecnolóxico global. Falaremos de varias cuestións
de gran relevancia para as persoas. Iso caracteriza o noso
ecosistema, que todos os temas teñen cabida", sinalou.
Programa e xornada de portas abertas
Algúns
dos nomes máis destacados que participarán estes días no congreso
son Inderpal Bhandari, directivo de IBM; Miuel Alava, director
xerente de Amazon Web Services; Andy Palmer, ex-director executivo de
Aston Martin; Juan Vicén Balaguer, co-fundador de Zeleros Hyperloop;
Ignacio Tovar, director de innovación de Iberia; Adipat Virdi,
experto en experiencias inmersivas e realidade virtual e
ex-responsábel de RV de Facebook; Pinar Emirdag, directora de
servizos dixitais de JP Morgan; JoAnn Stonier, directiva de
Mastercard; Michael Lawrick, xefe de innovación de Deloitte; ou
Ignacio Rivera, presidente executivo de Hijos de Rivera. Tamén
destaca a presenza de dous ex-primeiros ministros europeos: Zlatko
Lagumdzija (Bosnia e Hercegovina) e Esko Aho (Finlandia).
Durante
estas dúas xornadas analizarase o futuro de diferentes sectores,
como son a Intelixencia Artificial, o transporte, as finanzas, o
entretemento ou os desafíos xeopolíticos.
O
sábado, de 16.00 a 19.00 horas, a entrada a Ecosystems 2030 será
libre para toda a cidadanía. Os coruñeses e as coruñesas terán a
ocasión de afondar nos grandes retos tecnolóxicos da súa cidade e
da sociedade en xeral para os próximos dez anos, e coñecer da man
de directivos/as de Google, como Pilar Manchón, e outras grandes
empresas a visión empresarial sobre esa transformación.