Ineo convoca este xoves en Vigo ao máis representativo do sector TIC estatal
martes, 14 de decembro do 2010
- Jorge Cebreiros, presidente de Ineo
A asociación empresarial Ineo organiza este xoves 16 de decembro unha
xuntanza de profesionais do sector tecnolóxico-dixital con alcance galego e
estatal. De feito, está previsto que participen nesta cita, a celebrar en Vigo,
os máximos dirixentes das catorce asociacións que constitúen CONETIC, a confederación
española de firmas deste eido de actividade. Asemade, intervirán no evento algúns
dos máis salientables representantes do tecido produtivo da innovación galega. A
xuntanza, chamada Encontro
Empresarial do Sector TIC, dará comezo coa actividade InnovaMeet, un
apartado con vida propia que dará acubillo a diferentes encontros de breve
duración entre os participantes nesta cita e co obxectivo de asentar os
alicerces de colaboración a curto e medio prazo.
Por certo que o evento tamén contará coa
presenza do presidente da Xunta, Alberto Núñez Feijoo, a secretaria xeral de
Modernización, Mar Pereira, e o presidente de Ineo, Jorge Cebreiros (na imaxe).
Os tres encargaranse de valorar o potencial deste encontro (que se prevé o
primeiro dunha serie longa) e de clausuralo oficialmente.
Volvendo ao programa do encontro, cómpre dicir
que entre InnovaMeet e o remate das actividades, celebrarase un xantar no que
participarán os dirixentes de CONETIC e máis destacados membros do panorama
institucional e produtivo da nosa terra, amais de axentes de innovación e
representantes de empresas TIC.
Tras a xuntanza, Ineo presentará o seu novo Plan
Estratéxico 2011-2014 perante o seu Consello Consultivo, integrado polo
Consorcio Zona Franca de Vigo, a Confederación de Empresarios de Galicia, Banco
Sabadell Atlántico, Novacaixagalicia, a Asociación de Enxeñeiros de
Telecomunicación de Galicia e as Universidades de Vigo, A Coruña e Santiago de
Compostela.