Ineo co-organiza en Madrid o primeiro Foro Tecnolóxico INTERTIC
luns, 25 de setembro do 2017
As
PEME galegas levan tres anos de atraso dixital fronte ás europeas.
Este é un dos datos que máis nos tocan de preto dos recentes
informes da Confederación Española de Empresas de Tecnoloxías da
Información, Comunicacións e Electrónica, CONETIC,
que, para combater estas e outras eivas a nivel galego e estatal
(como por exemplo a escaseza de profesionais tecnolóxicos, o baixo
investimento en I+D, o pequeno tamaño das PEME e os seus límites
para medrar) vai celebrar o vindeiro xoves 28 de setembro, en Madrid,
a primeira edición do Foro
Tecnolóxico, INTERTIC. O evento contará con presenza galega,
máis polo miúdo da asociación de
empregas de tecnoloxías Ineo, que forma parte da asociación
organizadora.
O
Primeiro Foro Tecnolóxico Intersectorial dará a coñecer as
oportunidades que teñen as pequenas e medianas empresas en
escenarios actuais e de futuro en sectores protagonistas da
transformación dixital en España, mostrará casos de éxito e
identificará oportunidades de colaboración. Amais,
o encontro pretende servir de punto de encontro entre as
empresas asociadas e os actores relevantes relacionados con sectores
estratéxicos, “nun marco de oportunidades de negocio e cooperación
empresarial”, explica a organización, engadindo que outro dos
obxectivos é pór en xogo “un altofalante das necesidades
tecnolóxicas de máis dun millón de PEME en España”.
Ademais
dunha visión teórica, os asistentes ao evento poderán coñecer
casos de éxito de desenvolvemento de proxectos mediante o uso de
tecnoloxías e solucións en diferentes sectores e identificar
oportunidades de colaboración B2C e B2B en dinámicas de interacción
e networking.
INTERTIC
está orientado a directivos e profesionais daquelas empresas que
queiran ser, en palabras do presidente de CONETIC, Tomás Castro,
“tractoras do cambio preciso na armazón empresarial de España e,
que desexen coñecer ferramentas que favorezan o seu
desenvolvemento”.
O
evento céntrase nas seguintes grandes áreas de negocio: Industria
4.0 (para dar a coñecer a estratexia estatal no ámbito da industria
intelixente e innovadora, con posibilidades de financiamento
destinado a diagnósticos e implantacións e vindeiras actuacións
tanto europeas como nacionais, como a homologación de provedores de
diagnósticos para o plan Activa), seguridade da información e
ciberseguridade (para mostrar as oportunidades actuais no ámbito da
salvagarda dos datos ou o regulamento que en poucas semanas afectará
o mundo dos drones e vehículos non tripulados), Administración
Electrónica (onde se falará do novo Plan Nacional de Territorios
Intelixentes e daranse a coñecer exemplos reais da transformación
dixital das administracións e corporacións e Smart Cities) e
aplicacións móbiles (contando coa presenza de especialistas como
Benoit Tabaka, senior public manager
de Google EMEA, quen analizará as oportunidades presentes e
vindeiras do mundo do móbil na contorna de Android e dará a coñecer
as certificacións e ferramentas existentes para os desenvolvedores e
para as PEME nesa contorna).