Ineo achega un completo programa de formación en desenvolvemento, mercadotecnia e uso de redes sociais

A Asociación Ineo e G12 Grupo Empresarial de Servizos ofrecen esta tempada de outono e inverno un máis que completo programa formativo para avanzarmos en transformación e en dotarnos de coñecementos sobre aquelas ferramentas tecnolóxicas que máis nos poden axudar na recuperación económica. Trátase dun servizo complemente de balde para traballadores do sector TIC, principalmente, aínda que tamén se achegan prazas para persoas desempregadas. A axenda de cursos inclúe oportunidades para dar pasos en desenvolvemento de páxinas web, creación de apps ou manexo das redes sociais.
Esta é a listaxe de cursos que ofrecen Ineo e G12:
· Creación, programación e deseño de páxinas web con HTML5 e CSS3 (80 horas de formación, do 16 de outubro ao 16 de decembro).
· Programación en .NET e programación en ASP.NET (165 horas de formación, a desenvolver do 26 de outubro ao 26 de xaneiro).
· Desenvolvemento de aplicacións con Java e desenvolvemento de aplicacións móbiles Android para a dixitalización de empresas (80 horas, do 30 de outubro ao 30 de decembro).
· Experto en marketing dixital e social media (165 horas, do 4 de novembro ao 4 de febreiro).
· Segunda quenda do curso Creación, programación e deseño de páxinas web con HTML5 e CSS3 (80 horas, do 18 de novembro ao 18 de xaneiro).
· Desenvolvemento de aplicacións con Java e desenvolvemento de aplicacións móbiles Android para a dixitalización de empresas (80 horas, do 11 de decembro ao 11 de febreiro).
Todas as formacións devanditas impartiranse exclusivamente en modalidade online a través dunha plataforma e-learning e cun 20% das horas de actividade docente levándose a cabo mediante aula virtual (sesións en directo co docente).