Industria e o Tribunal de Contas impulsarán a e-administración no eido local

Co fin de participar no desenvolvemento de sistemas telemáticos en relación coa administración local, o Ministerio de Industria e máis o Tribunal de Contas veñen de asinar un protocolo de colaboración conxunta. O devandito acordo ten como obxectivo impulsar a administración electrónica nas Entidades Locais, sobre todo no relativo á rendición de contas e ó cumprimento doutras obrigas legais destas entidades, mediante procedementos de tramitación a distancia (vía as novas tecnoloxías).
Esta estratexia de implantación da Administración Electrónica do Plan Avanza ten entre os seus obxectivos garantir que os concellos españois lles ofrezan ós seus cidadáns un conxunto de servizos básicos en formato electrónico, facendo un especial fincapé naqueles de menor tamaño.
Pola súa banda, o Tribunal de Contas está a promover a implantación no ámbito local dun procedemento telemático que lles facilite ás Entidades Locais dar cumprimento -por este medio- á súa obriga legal de render contas anuais e de remisión doutra información preceptiva.

Financiamento e actuacións previstas
Para estas actuacións, Industria aportará 479.000 euros e o Tribunal de Contas outros 227.965 euros, de maneira que se poidan levar a cabo as seguintes actuacións:
· Rendición de contas en soporte informático e por medios telemáticos.
· A súa implantación en equipos que permitan desenvolver as súas propias actividades a outras entidades de fiscalización simultaneamente co Tribunal de Contas.
· A remisión ó Tribunal de Contas de outras informacións preceptivas.
· O emprego de medios de identificación electrónica.
· A formación de persoal das Entidades Locais e as Deputacións Provinciais, de xeito que obteñan a cualificación precisa para o emprego das novas ferramentas.
· A implantación dun servizo de axuda que resolva as incidencias técnicas e asesore permanentemente ás Entidades Locais.
· A posibilidade de que os cidadáns consulten as contas das Entidades Locais.
· A integración con outros módulos de Administración electrónica desenvolvidos polo Ministerio de Industria.