Indra visita as instalacións do CiTIUS
luns, 20 de marzo do 2017
Indra,
empresa española centrada en múltiples ámbitos innovadores
(telecomunicacións, TIC, servizos financeiros, transporte ou
enerxía), estivo
a semana pasada visitando as instalacións do Centro Singular de
Investigación en Tecnoloxías da Información (CiTIUS) da
Universidade de Santiago. A actividade desenvolveuse o xoves 16 e
nela participou unha importante delegación da multinacional
española, unha compañía que, como lembraremos, ten unha
salientábel presenza na nosa terra, onde conta con oficinas e equipa
de traballo (na Coruña e en Santiago) e onde estableceu acordos e
colaboracións con múltiples entidades (coa
Universidade da Coruña, con R,
Ilux e Altia, ou coa
Consellería de Economía para impulsar o proxecto Civil UAV
Initiative).
Durante
a vista, os representantes de Indra (seis en total) puideron coñecer
de primeira man algúns dos resultados de investigación obtidos ao
longo dos últimos meses polos integrantes do CiTIUS, participando
durante toda a xornada nunha visita organizada polo centro coa que se
pretendía “ofrecer unha perspectiva global das súas
potencialidades científicas”.
Os
“embaixadores” de Indra, nun plano máis detallado, deron conta
dos detalles técnicos de cada demostrador e intercambiaron
información sobre o modelo de innovación Indraventures,
o recurso posto en xogo pola compañía para artellar a súa
innovación corporativa, promovéndoa “tanto dentro como fóra de
Indra” e baixo un modelo que busca o desenvolvemento colaborativo
de iniciativas nun ecosistema aberto. Neste teñen cabida novas
firmas de mercado, universidades, centros tecnolóxicos, spin-offs e
aceleradoras.