InLugo comeza nova andaina con accións de divulgación TIC na contorna da cidade
xoves, 9 de abril do 2015
Finalmente comezou
este mércores a nova tempada de actividades do Centro de Innovación
Social, InLugo, que xestiona a Fundación
TIC (Deputación Provincial). A nova andaina, que arrancou en
seis parroquias do termo municipal da propia Cidade da Muralla,
achega como principal novidade a inclusión de cursos e obradoiros
en toda a provincia. O obxectivo destas actividades: achegar as novas
tecnoloxías a todos os maiores de 55 anos, con independencia do seu
lugar de residencia. Segundo informa a Deputación este segundo
trimestre haberá cursos e obradoiros en 11 Concellos e 10 parroquias
do concello de Lugo, amais das habituais na sede do centro. En total,
53 accións e preto de 600 prazas gratuítas.
Os primeiros cursos desenvólvense o 8 e 9 de abril
nas parroquias de San Pedro de Mera, Santa María de Bóveda, San
Xóan do Campo, Poutomillos, Santa Comba e Coeses, ás
que se sumarán o 27 e 28 de abril, as de Meilán, Rubiás, Santiago
de Saa e Calde. En cada unha delas haberá un curso de catro horas
repartido en dous días.
Os veciños de San Pedro de Mera, en horario de
11:00 a 13:00 horas e os Poutomillos, de 16:30 a 18:30, participan no
taller: Mantemos en forma o cerebro; os de Santa María de
Bóveda e Santa Comba no de Manéxate coas novas tecnoloxías:
coñece a túa tableta; e os de San Xoán do Campo e Coeses no
de Toma e retoca a túas fotos coa tableta.
Polo que respecta ao ámbito provincial e segundo
explica a Deputación, o sábado comezarán en Friol as actividades
que se desenvolverán en 11 concellos, e que se ampliarán a todos os
municipios da provincia en vindeiras edicións. Haberá dous cursos
en cada municipio “co obxectivo de facilitar o uso das novas
tecnoloxías aos maiores sen ter que desprazarse do seu lugar de
residencia”, explica o organismo provincial. Os dous cursos de
Friol serán os días 11, 18 e 24 de abril. Na parroquia de Condes
impartirase Manexo básico de ordenador e na de Carballo,
Atréveste con internet?. A semana que vén, do 13 ao 16 de
abril, o InLugo achegarase ao Concello de Castro de Rei con:
Estimulación cognitiva e funcional con videoconsolas e
Atréveste con internet? Os cursos continuarán en vindeiras
datas en Meira, Pol, Guitiriz, Castroverde, O Corgo, Vilalba,
Xermade, Guntín e Muras.
Na sede do InLugo as actividades comezarán
a semana que vén. En total 273 prazas repartidas en 21
obradoiros e cursos, dos que 14 xa teñen todas as prazas cubertas.
Para os outros sete, os interesados aínda poden apuntarse a través
de fundaciontic.org e
deputacionlugo.gal ou
chamando ao número de teléfono 982 225 186, segundo informa a
Deputación. “Os cursos”, explica o organismo provincial galego,
“abordarán o manexo de diversos dispositivos como o computador, a
tableta ou o smartphone, así como conceptos básicos para
manexarse por internet ou en diferentes redes sociais”. Polo que se
refire aos obradoiros, “traballarán diferentes capacidades
cognitivas e funcionais como a memoria, a atención, a orientación
espacial ou o equilibrio co computador, a tableta ou as
vídeoconsolas”. Todas estas actividades están incluídas na
actuación Promoción da Autonomía Persoal dos Maiores
da Provincia que xestiona a Fundación TIC a través dunha
encomenda da Deputación con fondos exclusivamente provinciais.