Imatia participa no desenvolvemento dun gran aeroxerador mariño
martes, 30 de novembro do 2010
Imatia, a empresa socia de INEO
dedicada sobre todo ao desenvolvemento de proxectos de e-business e á
consultoría TIC, vén de participar no desenvolvemento dun aeroxerador mariño de
gran tamaño, no marco do proxecto Azimut, no que colabora con outras once
compañías e 22 centros de investigación.
O obxectivo deste proxecto é xerar
o coñecemento necesario para crear unha turbina offshore de até 15 MW, con tecnoloxía 100 por cento española.
O proxecto Azimut, que foi aprobado
polo Centro para o Desenvolvemento Tecnolóxico Industrial (CDTI), requerirá dun
investimento de 25 millóns de euros nos vindeiros catro anos, e será
cofinanciado por diversas firmas implicadas entre as que destacan Imatia, Iberdrola,
Alstom Wind ou Acciona Windpower.
Os obxectivos son, segundo achegan
dende a web de INEO, “conseguir unha
potencia unitaria de 15 MW, así como superar as barreiras técnicas e económicas
que limitan na actualidade o despregamento da enerxía eólica mariña”.