O ITG mostrará nunha xornada as oportunidades de I+D+i e internacionalización que ofrecen os fondos europeos
venres, 18 de marzo do 2022
O
Instituto Tecnolóxico de Galicia (ITG) organiza, o vindeiro mércores
23 de marzo, de 10h a 13.30h, na súa sede da Coruña, unha xornada
gratuíta na que abordará, da man de especialistas de diferentes
áreas, as oportunidades que os fondos europeos ofrecen ás empresas
en materia de I+D+i e internacionalización.
Participarán
responsábeis das áreas de IA (Intelixencia Artificial), enerxía
intelixente para a transición enerxética e drons do Instituto,
facendo unha exposición detallada sobre os aspectos máis novos para
as empresas en cada unha das materias e debullarán casos de éxito
en Galicia nestes ámbitos tecnolóxicos que, en palabras do ITG,
“abren múltiples posibilidades ás empresas galegas”.
Un
dos puntos concretos que se abordará na xornada é o referente ás
oportunidades que ofrecen os fondos Next Generation para as empresas
galegas. En concreto, a través de Horizonte Europa, o principal
programa de financiamento da UE en materia de investigación e
innovación ao que os Next Generation sumou 5.000 millóns de euros.
A este súmanse Eurostars, un programa de apoio a pemes innovadoras
para o desenvolvemento de proxectos transnacionais colaborativos e
orientados ao mercado e Pathfinder, que ofrece financiamento para
desenvolvementos de ideas disruptivas.
A
asistencia á xornada, de carácter presencial, é libre previa
inscrición na web do ITG.
Está dirixida a xestores de I+D e de innovación de empresas
produtivas e de servizos, administracións e profesionais que desexen
coñecer as oportunidades que ofrecen estas tecnoloxías e os fondos
europeos.