INEO sela unha alianza coa multinacional TÜV para facilitar ao máximo a innovación das nosas PEME
xoves, 27 de marzo do 2014
A asociación empresarial
INEO, plataforma galega de firmas
TIC, vén de informar do desenvolvemento dun acordo e dunha xornada
(resultante do dito acordo) dirixidos a facilitar a achega de
combustíbel para a innovación das nosas PEME. O acordo en cuestión,
asinado hoxe, foi formalizado coa entidade certificadora TÜV
Rheinland, de raizame xermana. A través deste convenio, INEO
colaborará coa devandita empresa (referente en servizos técnicos a
nivel mundial) achegando expertos seleccionados entre o seu persoal
ou dos seus asociados para a avaliación técnico-económica de
Proxectos de I+D+i. Froito desta alianza é tamén a xornada
desenvolvida este 27 de marzo, da man de INEO, TÜV e F.Iniciativas.
Falamos da xuntanza
Desgravación
fiscal en I+D segundo a Lei de Apoio a Emprendedores,
dirixida a afondar nas novidades introducidas no novo
marco regulamentario da devandita Lei, facendo fincapé nos
incentivos fiscais que se poden aplicar no relativo a actividades de
innovación empresarial. Na cita fíxose saber que a Lei ten como
finalidade promover a cultura emprendedora e facilitar a través de
moi diversos recursos, incluídos os ditos incentivos. De feito, na
xornada falouse de como se poden acadar estas deducións no imposto
de sociedades a través da solicitude do informe motivado mediante a
certificación de proxectos conforme ao Real Decreto 1432/2003 que
establece os requisitos científicos e tecnolóxicos para a obtención
do devandito informe.
Por outra banda, tamén
se lembrou aos presentes que os ditos incentivos á innovación (que
poden acadar os tres millóns de euros) presentan unha serie de
problemas: sobre todo o gran descoñecemento que existe destas
cuestións por parte de moitas empresas, principalmente as PEME, así
como as dificultades que implica determinar que gastos e accións son
susceptíbeis de beneficiarse das deducións. A xornada de INEO
responde precisamente a unha necesidade de informar e clarificar
conceptos, abordando requisitos, procedementos e posíbeis erros
cometidos polas empresas ao fío do devandito.
O encontro, presentado
pola directora xeral de INEO, Lucía Gregorio, comezou co relatorio
titulado I+D+i e Patent Box. Ámbito de aplicación e marco
fiscal, impartido polo especialista e consultor comercial de F.
Iniciativas, Iago Tello, que se centrou na definición dos ditos
conceptos de acordo coa nova normativa e na metodoloxía a seguir
para determinar as porcentaxes a aplicar. Tamén se abordou o
denominado cheque fiscal, un dos cambios introducidos na Lei de
Emprendemento sobre a aplicación actual das desgravacións fiscais
por I+D+i que maior interese xerou e polo que Facenda abonará até
o 80% do importe das deducións xeradas por realizar actividades de
I+D+i ás empresas aínda que non teñan beneficios, “algo que até
agora non ocorría”, subliñouse. A exposición correu a cargo da
responsábel técnica de I+D+i de TÜV Rheinland, María Rioja, que
explicou como se poden conseguir estas deducións no imposto de
sociedades a través do procedemento de solicitude do informe
motivado, mediante a certificación de proxectos conforme ao Real
Decreto 1432/2003, de 21 de novembro, que establece os requisitos
científicos e tecnolóxicos para a obtención do devandito informe.
Realizou ademais unha análise comparativa das modificacións fiscais
introducidas na nova lei de emprendedores en relación coa anterior
regulación.
Tralo remate da xornada,
como dixemos, formalizouse a sinatura do convenio entre INEO e TÜV,
polo que a partir de agora a asociación galega colaborará coa
multinacional seleccionando especialistas de entre o seu persoal e as
empresas socias para os exames de proxectos de innovación que sexan
obxectivo de certificación.
Lembrar que o Grupo TÜV
Rheinland é unha empresa referente en servizos técnicos a nivel
mundial. Fundada en 1872 e con sede en Colonia, Alemaña, dá emprego
a 16.000 persoas en 500 oficinas repartidas por 65 países, xerando
uns 1.417 millóns de euros anuais. “Este acordo cunha das
compañías certificadoras máis prestixiosas do mundo”, informa
INEO, “representa un chimpo cualitativo e un recoñecemento ao
labor realizado pola asociación empresarial galega, que reafirma a
súa posición como referente asociativo TIC de Galicia”.